19 мая сего года Ереванский государственный университет и "Библос Банк Армения" (далее - Банк) подписали Меморандум о сотрудничестве, в соответствии с которым Банк будет ежегодно предоставлять стипендии и компенсацию платы за обучение 15 студентам, обучающимся в университете и демонстрирующим высокую успеваемость.
Ծրագիրը բանկի 15-ամյակի շրջանակում իրականացվող նախագծերից մեկն է, որի առանցքում «բուհ-գործատու» գործընկերությունն ու ընդհանուր հետաքրքրություն ունեցող ծրագրերի շուրջ համագործակցությունն են։
2023-2024 ուսումնական տարվա ընթացքում ԵՊՀ տնտեսագիտության և կառավարման ֆակուլտետի, ինչպես նաև հարակից մասնագիտությունների բակալավրիատի 3-րդ և 4-րդ կուրսերում և մագիստրատուրայում սովորող 10 ուսանող կստանա «Բիբլոս Բանկ Արմենիայի» անվանական կրթաթոշակ՝ 1 միլիոն դրամի չափով, ևս 5 ուսանող՝ ուսման վարձի փոխհատուցում։ Կկազմակերպվի նաև ուսանողներից 5-ի մասնագիտական պրակտիկան «Բիբլոս Բանկ Արմենիայում»՝ հետագայում Բանկում աշխատանքի անցնելու հնարավորությամբ։
Հուշագիրը ստորագրել են «Բիբլոս Բանկ Արմենիայի» գլխավոր գործադիր տնօրեն Հայկ Ստեփանյանը, ԵՊՀ ռեկտոր Հովհաննես Հովհաննիսյանը և ԵՊՀ տնտեսագիտության և կառավարման ֆակուլտետի դեկան Հայկ Սարգսյանը։ Գործակցության նպատակն է աջակցել, խթանել և իրականացնել ծրագրեր՝ միտված ուսանողների մասնագիտական գիտելիքների և գործնական հմտությունների զարգացմանը, ինչպես նաև աշխատաշուկայում նրանց մրցունակության խթանմանը։
ԵՊՀ ռեկտոր Հովհաննես Հովհաննիսյանը, կարևորելով այս համագործացությունն ու դրա ընձեռած հնարավորությունները, փաստեց, որ բուհ-աշխատաշուկա արդյունավետ կապը կրթության զարգացման երաշխիքներից է․ «Այս համագործակցությունը մեր պատկերացրած հաղորդակցության լավագույն դրսևորումներից է, երբ գործարար աշխարհի ներկայացուցիչները ներգրավվում են կրթական գործընթացում և նպաստում որակյալ, արհեստավարժ ու աշխատաշուկայի ներկայիս պահանջներին համապատասխան կադրերի պատրաստմանը։ Հատկանշական է, որ մեր գործընկերների կողմից տրամադրվելու են կրթաթոշակներ, որոնք ոչ միայն սոցիալական աջակցություն են լինելու մեր ուսանողների համար, այլև խրախուսելու են նրանց էլ ավելի լավ սովորելու և հաջողությունների հասնելու»։
«Բիբլոս Բանկ Արմենիայի» գլխավոր գործադիր տնօրեն Հայկ Ստեփանյանի խոսքով, Բանկը մեծ պատասխանատվությամբ է մոտենում Հայաստանում կրթության զարգացմանը և իր 15-ամյակին նվիրված նախագծերի շրջանակում չէր կարող չանդրադառնալ այս ոլորտին ևս։
«ԵՊՀ-ի հետ այս համագործակցության նպատակն է երիտասարդներին տրամադրել անհրաժեշտ գիտելիք ու հմտություններ՝ ֆինանսաբանկային համակարգում իրենց կարիերան կառուցելու համար: Մենք լավ արդյունքներ ենք ակնկալում այս նախագծից և հույս ունենք ապագայում ԵՊՀ շրջանավարտներին տեսնելու մեր՝ օրեցօր աճող ու մեծացող թիմում»,- նշեց Հայկ Ստեփանյանը։
Հուշագրի կնքման պաշտոնական արարողությունը տեղի ունեցավ ուսանողների, Բանկի ու ԵՊՀ ղեկավար կազմերի, ինչպես նաև հյուրերի մասնակցությամբ, որից հետո ուսանողները տեղում ստացան իրենց հետաքրքրող հարցերի պատասխաններն ու շփվեցին Բանկի աշխատակիցների և տնօրինության ներկայացուցիչների հետ։
Կողմերը պայմանավորվածություն ձեռք բերեցին համատեղ նախագծերի կազմակերպման, համալսարանական միջոցառումներին Բանկի մասնակցության, ինչպես նաև Բանկի գործունեության տարբեր ոլորտներում իրականացվող ուսումնասիրություններում ու այլ աշխատանքներում ֆակուլտետի պրոֆեսորադասախոսական կազմի և ուսանողների ներգրավման, համատեղ գիտահետազոտական նախագծերի ու ֆինանսաբանկային ոլորտին առնչվող հիմնախնդիրների վերաբերյալ հետազոտությունների իրականացման շուրջ։