Հունագիտության գիտաուսումնական կենտրոն-գրադարան

ԵՊՀ հունագիտության կենտրոն-գրադարանը հիմնադրվել է 1999 թ. Հունաստանի Սալոնիկ քաղաքի Արիստոտելի անվան համալսարանին կից գործող «ՅԱՍՈՆ» ծրագրի աջակցությամբ։ Կենտրոնի հանդիսավոր բացումը տեղի է ունեցել 1999 թ. մայիսի 13-ին Հայաստանի և Հունաստանի նախագահների ներկայությամբ։

1999 թ․ դեկտեմբերի 8-ին ԵՊՀ ռեկտորի հրամանով Երևանի պետական համալսարանում ստեղծվեց Հունագիտության գիտաուսումնական կենտրոնը: Կենտրոնն ունի հարուստ գրադարան, որտեղ, բացի հունական նոր գրականության դասականների հարուստ ընտրանուց, կան նաև ժամանակակից հունարենի նորագույն դասագրքեր, ուսումնական ձեռնարկներ, հանրագիտարաններ և բառարաններ։

Ստեղծման օրվանից կենտրոնը համագործակցում է Հունաստանի մի շարք գիտակրթական հաստատությունների հետ, այդ թվում՝ Պետական կրթաթոշակների հիմնադրամի, «Ալեքսանդրոս Օնասիս» բարեգործական հիմնադրամի, Աթենքի ազգային և կապոդիստրիան համալսարանի, Արիստոտելի անվան Սալոնիկի համալսարանի, Իոաննինայի համալսարանի և Հռոդոսի Էգեյան համալսարանի հետ։ Վերջին տարիներին կենտրոնը համագործակցում է նաև Թրակիայի Դեմոկրիտուս համալսարանի հետ։

2000 թվականից սկսած՝ ԵՊՀ-ն Արիստոտելի անվան Սալոնիկի համալսարանի հետ համագործակցում է «ՅԱՍՈՆ» ծրագրի շրջանակում, որը հնարավորություն է ընձեռում մեր ուսանողներին մասնակցելու հունարենին և հունական մշակույթին նվիրված մեկամսյա, ինչպես նաև ութամսյա դասընթացներին։

Հունագիտության գիտաուսումնական կենտրոնի գործունեությունը

Հունագիտության գիտաուսումնական կենտրոնում իրականացվում է՝

• նոր հունարենի դասավանդում,
• գիտահետազոտական աշխատանք,
• հայ–հունական մշակութային կապերի ամրապնդում:

Կենտրոնի գործունեության  հիմնական նպատակներն են՝

• հունարենի ուսումնասիրության տարածումը՝ ժողովրդայնացնելով հունարենն ու գրականությունը,
• հունարենի ուսումնասիրությունը մասնագիտական բնագավառներում՝ կրոնագիտություն, աստվածաբանություն, փիլիսոփայություն, գրականագիտություն,
• հույն և հայ բարեկամ ժողովուրդների քաղաքակրթական համագործակցությանն աջակցումը,
• հունական մշակույթի զարգացումը Հայաստանում,
• թե՛ Հունաստանի, թե՛ այլ երկրների հունական կենտրոնների հետ կապերի ամրապնդումն ու զարգացումը: