Դեղերի որակի հսկման և մոնիթորինգի գիտաուսումնական կենտրոն

ԵՊՀ Ֆարմացիայի ինստիտուտի Դեղերի որակի հսկման և մոնիթորինգի գիտաուսումնական կենտրոնը ստեղծվել է ՀՀ ԿԳՄՍ նախարարության կրթական ծրագրերի կենտրոնի կողմից իրականացվող «Կրթության բարելավում» վարկային ծրագրի՝ «Նորարարությունների մրցակցային հիմնադրամի» շրջանակում՝ Համաշխարհային բանկի կողմից ֆինանսավորված «14/19-CIF» դրամաշնորհի միջոցներով։ Ծրագրի և կենտրոնի գիտական ղեկավարը ՀՀ ԳԱԱ նախագահ, ակադեմիկոս Աշոտ Սաղյանն է:

Կենտրոնի պաշտոնական բացումը տեղի է ունեցել 2021թ. նոյեմբերի 16-ին, իսկ նրա հենքի վրա 2021 թվականից Ֆարմացիայի ինստիտուտում գործում է Ֆարմքիմիայի և ֆարմակոգնոզիայի ամբիոնի առաջարկած «Դեղերի որակի վերահսկում» մագիստրոսական ծրագիրը:

Դեղապատրաստուկների որակի հսկման և մոնիթորիգի գիտաուսումնական կենտրոնը հագեցած է բարձր ճշտության գերժամանակակից սարքավորումներով՝

• Ինֆրակարմիր (ԻԿ) սպեկտրաչափ,

• Բարձր արդյունավետության հեղուկային քրոմատոգրաֆ (ԲԱՀՔ),

• Իոնային քրոմատոգրաֆ,

• Գազային քրոմատոգրաֆ,

• Հեղուկային քրոմատոգրաֆ համակցված մասս-սպեկտրաչափական դետեկտորով (ՀՔ-ՄՍ),

• Միկրոալիքային տարրալուծման համակարգ,

• Ինդուկտիվ կապված պլազմայով օպտիկաէմիսսիոն սպեկտրաչափ:

Կենտրոնում իրականացվում են դեղերի, կենսաբանորեն ակտիվ հավելումների և այլ պատրաստուկների որակի հսկում, իսկության հաստատում, դեղերի համասեռության, մաշվելիության, միջին կշռի, քանակական համապատասխանության վերլուծություն, նմուշների իոնային կազմի որոշում, մոնո- և դիշաքարների քանակական և որակական անալիզ, կայուն օրգանական աղտոտիչների, սպիրտների, ճարպաթթուների նույնականացում, քիրալային միացությունների ԲԱՀՔ վերլուծություն, նպատակային միացությունների իսկության հաստատում ՀՔ-ՄՍ և ԻԿ լուսաչափական մեթոդներով, պոչամբարների, ջրերի, ապարների էլեմենտային կազմի վերլուծություն, վերլուծական մեթոդների վալիդացում, չափորոշիչ տեխնիկական փաստաթղթերի (ՉՏՓ) մշակում: