Սոցիալ-տնտեսական աշխարհագրության ամբիոն

Սոցիալ-տնտեսական աշխարհագրության ամբիոնը հիմնադրվել է 1933-1934 ուստարում: Հիմնադրումից մինչև 1936 թ․ այն ղեկավարել է պրոֆեսոր Տիգրան Աթաբեկյանը, ապա՝ պրոֆեսոր Գուրգեն Քոչարյանը, դոցենտներ Սիրաք Բերբերյանը, Երեմ Եղիազարյանը, Արամ Օհանյանը, պրոֆեսորներ Թադևոս Հակոբյանը, Լեմվել Վալեսյանը և Արամայիս Ավագյանը:

Սոցիալ-տնտեսական աշխարհագրության ամբիոնի վարիչն է մանկավարժական գիտությունների թեկնածու, դոցենտ Վահագն Գրիգորյանը։

1977-1991 թթ․ ամբիոնն իրականացրել է «Հայրենագիտություն» և «Էքսկուրսիոն գործի կազմակերպման մեթոդիկա» մասնագիտական դասընթացները: 2008-2013 թթ․ ամբիոնը կազմակերպել է «Սերվիս» մասնագիտության բակալավրիատի ուսումնական պլանի և առարկայական ծրագրերի կազմումն ու դասավանդումը:

Այժմ ամբիոնն իրականացնում է «Աշխարհագրություն» բակալավրիատական և «Հասարակական աշխարհագրություն» մագիստրոսական կրթական ծրագրերը։

Մեծ է ամբիոնի ներդրումը Հայաստանում աշխարհագրության կրթական համակարգի ձևավորման և զարգացման գործում: Ամբիոնի դասախոսների մասնակցությամբ ստեղծվել են հանրակրթական դպրոցների և բուհերի աշխարհագրության դասագրքեր, ուսումնական ձեռնարկներ և ուսումնամեթոդական գրականություն, գիտամանկավարժական բազմաթիվ հոդվածներ:

Սոցիալ-տնտեսական աշխարհագրության ամբիոնում գիտահետազոտական աշխատանքներ են տարվում ՀՀ տնտեսության համաչափ զարգացման և արդյունավետ տեղաբաշխման, տարաբնակեցման համակարգի զարգացման և կատարելագործման, սահմանամերձ և բարձր լեռնային բնակավայրերի սոցիալ-տնտեսական զարգացման, ժողովրդագրական իրավիճակի աշխարհագրական հիմնահարցերի ուղղություններով:

Ամբիոնի պրոֆեսորադասախոսական կազմն իր գործունեության տարիներին մասնակցել է Հայաստանի Հանրապետության տնտեսական շրջանացման, վարչատարածքային բաժանման աշխատանքներին:

Ամբիոնը գիտաուսումնական կապեր ունի Ղազախստանի Ն. Գումիլյովի անվան եվրասիական միջազգային համալսարանի, Դոնի Ռոստովի հարավային դաշնային համալսարանի աշխարհագրության ֆակուլտետների հետ: