ԵՊՀ հունագիտության կենտրոնում տեղի է ունեցել միջոցառում, որը միտված էր հայ-հունական գործակցային հարաբերությունների ամրապնդմանը:
Միջոցառումը նվիրված էր Հունաստանի ազգային տոնին՝ Անկախության օրվան. Հունաստանն այս տարի տոնում է անկախության 202-ամյակը:
Միջոցառմանը ողջույնի խոսքով հանդես է եկել և տոնի առթիվ շնորհավորական ուղերձ հղել ԵՊՀ հունագիտության կենտրոնի տնօրեն, պ.գ.թ., դոցենտ Լիզա Քարիմյանը: Անդրադառնալով հայ-հունական սերտ համագործակցությանը՝ Լ. Քարիմյանը ներկայացրել է կենտրոնի գործունեությունը, հիմնական նպատակները՝ ընդգծելով ուսանողների մեծ հետաքրքրությունը հունարենի և հունական մշակույթի նկատմամբ:
Այնուհետև ԵՊՀ ուսանողները ներկայացրել են տոնի պատմությունը, օրվա խորհուրդը: Միջոցառումը եզրափակվել է ուսանողների ասմունքով, հունական երգ ու պարով:
Նշենք, որ միջոցառմանը ներկա էին ԵՊՀ միջազգային համագործակցության վարչության պետ Ալեքսանդր Մարգարովը, Հայաստանի Հանրապետությունում Հունաստանի դեսպանության ռազմական կցորդ Գերասիմոս Ավլոնիտիսը և այլ հյուրեր:
