ԵՊՀ ուսանողական խորհուրդը հայտարարում է կրթաթոշակի մրցույթ

Երևանի պետական համալսարանի ուսանողական խորհուրդը, համագործակցելով Կոնվերս բանկի հետ, ԵՊՀ ՈՒԽ 30-ամյակին նվիրված միջոցառումների շրջանակում հայտարարում է կրթաթոշակի մրցույթ։

Կրթաթոշակի մրցույթին դիմելու հնարավորություն ունեն ԵՊՀ այն ուսանողները, որոնք.

• սովորում են բակալավրիատի 1-3-րդ կուրսերում,
• ունեն բարձր առաջադիմություն,
• ունեն ներհամալսարանական և արտահամալսարանական կյանքում հասարակական բարձր ակտիվություն։

Կրթաթոշակին դիմելու համար անհրաժեշտ է student_council@ysu.am էլհասցեին ուղարկել հետևյալ փաստաթղթերը՝ նամակի վերնագրի դաշտում (Subject) նշելով «ՈՒԽ-30» կրթաթոշակի մրցույթ.

• ինքնակենսագրական (CV),
• մոտիվացիոն նամակ (ինչո՞ւ եք դիմել կրթաթոշակի մրցույթին, ինչո՞ւ պետք է ընտրենք հենց Ձեզ),
• ակադեմիական տեղեկագիր (կնքված և ստորագրված),
• հասարակական ակտիվությունը հավաստող տեղեկանք(ներ) և այլ փաստաթղթեր։

Առկայության դեպքում կարող եք ներկայացնել նաև հետևյալ փաստաթղթերը՝

• սոցիալական անապահովության, հաշմանդամության և/կամ ընտանիքի անդամների հաշմանդամության կարգի վերաբերյալ համապատասխան փաստաթղթեր,
• մարտական հերթապահության, պատերազմի մասնակցության մասին հավաստող փաստաթղթեր,
• գիտական հոդվածներ, կրթության, գիտության, մշակույթի, սպորտի ոլորտում (օլիմպիադա, մրցույթներ և այլն) գրանցած հաջողությունները հավաստող փաստաթղթեր,
• այլ փաստաթղթեր՝ ըստ անհրաժեշտության։

Բոլոր փաստաթղթերն անհրաժեշտ է ներկայացնել PDF ձևաչափով։

Դիմելու վերջնաժամկետը 2024 թվականի ապրիլի 16-ն է։

Հայտադիմումը ներկայացնելուց հետո Ձեր էլհասցեին կուղարկվի հաստատման նամակ։ 

Անհրաժեշտության դեպքում կանցկացվի նաև հարցազրույցի փուլ։

Մրցույթի արդյունքում 30 ուսանող կարժանանա միանվագ կրթաթոշակի՝ 100 000 (հարյուր հազար) ՀՀ դրամի չափով։