Ս․թ․ նոյեմբերի 6-8-ը՝ ժամը 9։30-ին, կանցկացվի «Տեսալսողական պատում, դրամատուրգիա և թարգմանություն» խորագրով միջազգային գիտաժողով՝ նվիրված Երևանի թատրոնի և կինոյի պետական ինստիտուտի հիմնադրման 80-ամյակին։

Հաղորդակցման միջոցների անցումը անալոգայինից թվայինի ոչ միայն հեղափոխեց տեխնոլոգիաները, այլև մեծ ազդեցություն թողեց պատմասացության (storytelling) վրա թե՛ տեսալսողական (աուդիովիզուալ) մշակույթում, թե՛ թատրոնում: Թվային այս դարաշրջանում պատմասացությունն ընդալայնել է իր սահմանները:

Դա հատկապես ակնհայտ է թատրոնում, որտեղ ինտերակտիվ, իմերսիվ և մուլտիմեդիա ձևաչափերը գալիս են փոխարինելու ավանդական ձևաչափին: Վերանում է ստեղծագործողի և հանդիսատեսի միջև եղած պատնեշը, իսկ ստեղծագործությունները տեխնոլոգիաների միջոցով տարածելու անհրաժեշտությունը սպառնում է հանգեցնելու «հոլովակային մտածողության»:

Միևնույն ժամանակ, թվային միջավայրը նպաստում է արվեստի տարբեր տեսակների մերձեցմանը. կինոգործիչները, գրողները, երաժիշտները և վիզուալ արվեստագետներն այժմ համատեղ ստեղծում են մուլտիմեդիա նախագծեր՝ կիրառելով սցենարագրության անսպասելի մեթոդներ:

Այս դինամիկ և անընդհատ զարգացող միջավայրում պատմվածքը շարունակում է ծառայել որպես հզոր գործիք՝ բարդ թեմաներ ուսումնասիրելու և երկխոսություն ստեղծելու համար: Անդրադառնալով սոցիալական խնդիրներին, ուսումնասիրելով մարդու հոգեվիճակը՝ թվային պատմությունները կարող են իրենց ներգործությունն ունենալ հանդիսատեսի վրա՝ այդպիսով ազդելով ամբողջ հասարակության վրա։

Կարևորելով նորարարությունը, համագործակցությունը և ներառականությունը՝ ներկայում մենք կարող ենք գեղարվեստական արտահայտման նոր հնարավորություններ բացահայտել:

Թարգմանության միջոցով տեսալսողական պատմվածքների հասանելիության ընդլայնումը կարևոր է մշակութային փոխանակումը խթանելու և ավելի լայն լսարան ունենալու համար: Պատմվածքների թարգմանությունը վերացնում է լեզվական խոչընդոտները, ինչը հնարավորություն է տալիս պատմությունները դարձնելու համամարդկային: Սա ոչ միայն ընդլայնում է առկա սահմանները, այլև նպաստում է միջմշակութային փոխըմբռնմանը: Տեխնոլոգիաների զարգացմանը զուգահեռ՝ մեծ տեղ է զբաղեցնում թարգմանության և տեղայնացման ներուժը, ինչը հնարավորություն է տալիս առավել ազդեցիկ պատմություններ ներկայացնելու հանդիսատեսին:

Այս գիտաժողովի նպատակն է հարթակ տրամադրել տեսալսողական (աուդիովիզուալ) պատումների, ինչպես նաև դրամային և թարգմանությանն առնչվող հարցերի շուրջ քննարկումներ անցկացնելու համար։ Գիտաժողովին մասնակցելու հնարավորություն ունեն կատարողական արվեստի, կինոգիտության, լեզվաբանության, թարգմանագիտության, ինչպես նաև մշակութաբանության ոլորտների ներկայացուցիչները:

Գիտաժողովի շրջանակում կքննարկվեն տարաբնույթ թեմաներ։

• Պատմասացության ժամանակակից միտումներ

• Դրամատիկական ստեղծագործությունները տարբեր մեդիաներում  

• Տեսալսողական պատումների առանձնահատկություններ 

• Երաժշտության դերը տեսալսողական պատումներում

• Հանդիսատեսի կողմից տեսալսողական պատումների ընկալում և մեկնաբանում

• Տեսալսողական դրամայի մշակութային և պատմական հեռանկարներ

• Բազմազանության ներկայացումը տեսալսողական պատումներում

• Ենթագրեր, կրկնօրինակում և աուդիո նկարագրություն 

• Ներառականությունը տեսողական պատումներում 

• Տեսալսողական թարգմանության ժամանակակից գործիքներ 

• Մուլտիմոդալ թարգմանություն 

• Հանդիսատեսի կողմից թարգմանված տեքստի բովանդակության ընկալում 

• Տեսալսողական թարգմանության էթիկա 

• Դրամատիկական ստեղծագործությունների թարգմանություն. բեմից էկրան

• Լեզվի ազդեցությունը կինոփորձառություն վրա

Գիտաժողովը հնարավորություն կընձեռի նաև վեր հանելու ոլորտում առկա արդիական խնդիրները, փոխանակվելու նոր գաղափարներով և մոտեցումներով, ինչը, անշուշտ, իր նպաստը կբերի կատարողական արվեստների, կինոյի, ինչպես նաև թարգմանական ոլորտի կայուն զարգացման գործին: