Прикладная арабистика
Магистерская программа
О программе
Արևելագիտության ֆակուլտետի արաբագիտության ամբիոնի մագիստրոսական կրթությունն իրականացվում է «Կիրառական արաբագիտություն» կրթական ծրագրով:
Ընդունելության պահանջները
«Արևելագիտություն» մասնագիտության գծով բակալավրի դիպլոմ ունեցողները մագիստրատուրա են ընդունվում մրցութային կարգով՝ ըստ ԵՊՀ-ում գործող կարգի: Այլ մասնագիտությունների գծով բակալավրի դիպլոմ ունեցողները հնարավորություն ունեն մասնակցելու մագիստրատուրայի ընդունելության մրցույթին տվյալ մասնագիտության բակալավրի պետական քննական ծրագրին համապատասխանող քննությունը հանձնելուց հետո։ Օտարերկրյա բուհերի շրջանավարտների ընդունելությունը մագիստրատուրա կատարվում է հարցազրույցի և համապատասխան ֆակուլտետի հանձնաժողովի կարծիքի հիման վրա։
«Կիրառական արաբագիտություն» ծրագրի ընդունելության քննության հարցաշարը հնարավոր է գտնել «Ընդունելություն» բաժնում։
Ծրագրի նպատակը
Ստանալով բարձրագույն մասնագիտական կրթություն՝ ուսանողները ձեռք են բերում անհրաժեշտ գիտելիքներ և գործնական հմտություններ աշխատաշուկայում պահանջված ու մրցունակ մասնագետ լինելու համար: «Կիրառական արաբագիտություն» կրթական ծրագրում ուսանողները սովորում են 2 տարի՝ ստանալով ինչպես ընդհանուր, այնպես էլ մասնագիտական ու նեղ մասնագիտական գիտելիքներ:
«Կիրառական արաբագիտություն» մագիստրոսական ծրագրի ավարտին շրջանավարտները տիրապետում են տարածաշրջանագիտական արդիական գործիքակազմին, խորապես պատկերացնում են սեմալեզու տարածագոտու ընդհանուր պատմա-, էթնո-, սոցիոլեզվական առանձնահատկությունները, ժամանակակից իսլամի պատմական, կրոնաիրավական և քաղաքական դրսևորումները։ Ծրագիրը պատրաստում է տեղական և միջազգային շուկայի պահանջներին համապատասխանող արևելագիտական տեսական խոր հենքով արաբագետ–մասնագետներ, ապահովում է նրանց տարածաշրջանագիտական արդի գործիքակազմին տիրապետելու հմտությունները, ուսանողի մոտ ձևավորում է տարածաշրջանային խնդիրները գնահատելու և վերլուծելու կարողություններ՝ հիմնվելով պատմական և մշակութային զարգացման օրինաչափությունների վրա, ապահովում է մասնագիտական արևելյան լեզվի պատշաճ իմացություն՝ գիտական բանավեճերի և քննարկումների մասնակցության հեռանկարով:
Առավելությունները
Արևելագիտության ֆակուլտետի «Կիրառական արաբագիտություն» կրթական ծրագիրը արաբագիտական դպրոցի ամենապահանջված կրթական ծրագիրն է: Ծրագիրը բաղկացած է ընդհանուր, մասնագիտական պարտադիր և կամընտրական դասընթացներից: Մասնագիտական պարտադիր և կամընտրական դասընթացների բովանդակությունը վերաբերում է տարածաշրջանային արդի հիմնախնդիրների վերլուծության, իսլամագիտության, լեզվաբանության և մշակութաբանության հիմնահարցերին:
Կարիերայի հնարավորությունները
Արևելագիտության ֆակուլտետի ուսանողները դառնում են տեղական և միջազգային շուկայի պահանջներին համապատասխանող մասնագետներ, որոնք հնարավորություն են ունենում գործի անցնելու թե՛ պետական, թե՛ մասնավոր կառույցներում։ Արևելագետները պահանջված են ՀՀ նախագահի աշխատակազմում, ՀՀ արտաքին գործերի նախարարությունում, պաշտպանության նախարարությունում, ազգային անվտանգության ծառայությունում, այլ պետական մարմինների տեղեկատվական–վերլուծական և արտաքին կապերի ստորաբաժանումներում, քաղաքագիտական, տնտեսական և մշակութաբանական հետազոտություններ իրականացնող ոչ պետական կազմակերպություններում և լրատվամիջոցներում, ինչպես նաև զբոսաշրջային գործունեություն ծավալող, արտահանմամբ և ներկրմամբ զբաղվող մասնավոր ընկերություններում։ Շրջանավարտների մի մասը հնարավորություն ունի գիտակրթական գործունեություն ծավալելու ՀՀ այնպիսի կարևոր գիտական կենտրոններում, ինչպիսիք են ՀՀ գիտությունների ազգային ակադեմիան, Մ. Մաշտոցի անվան Մատենադարանը, Երևանի պետական համալսարանը և պետական ու մասնավոր այլ բուհեր, գիտահետազոտական ինստիտուտներ:
Հետադարձ կապ
Դեկան` պ.գ.դ., պրոֆեսոր Ռուբեն Մելքոնյան
Դեկանատ`
Հեռ.՝ (+374 60) 710 573, (+374 60) 710 574, (ներքին՝ 55-73, 55-74)
Էլհասցե՝ orient@ysu.am
