Քարտեզագրության և գեոմորֆոլոգիայի ամբիոն

Քարտեզագրության և գեոմորֆոլոգիայի ամբիոնը հիմնադրվել է 1968 թ․ աշխարհագրական գիտությունների դոկտոր, պրոֆեսոր Ս. Բալյանի ջանքերով: Վերջինս ամբիոնը ղեկավարել է մինչև 1997 թ., իսկ 1997 թ. մինչև 2014 թ. այն ղեկավարել է աշխարհագրական գիտությունների դոկտոր, պրոֆեսոր Վ. Ռ. Բոյնագրյանը: 2014 թվականից ամբիոնը ղեկավարել է աշխարհագրական գիտությունների թեկնածու, դոցենտ Պ. Գ. Դավթյանը:

Ամբիոնն իր հիմնադրման օրից գործունեություն էր ծավալում հիմնականում հետևյալ ուղղություններով՝

• գեոմորֆոլոգիական երևույթների ուսումնասիրում,
• ռելիֆի ձևաչափական տարրերի ուսումնասիրում և քարտեզների կազմում,
• գեոդեզիական աշխատանքներ,
• քարտեզագրական (քարտեզների նախագծում, կազմում) աշխատանքներ։

Այսօր ամբիոնն ընդլայնել է իր հետազոտությունների շրջանակը․ ուսումնասիրություններ են կատարվում հետևյալ ուղղություններով՝

• միասնական կադաստր, գործունեություն,
• անշարժ գույքի չափագրում, հաշվառում, գնահատում, կադաստրի վարում,
• բնական ռեսուրսների կադաստրների վարում, հաշվառում, գնահատում,
• գեոդեզիական չափումներ, հատակագծերի կազմում,
• ԱՏՀ (GIS) հնարավորությունների ուսումնասիրում և ներդնում ոլորտային առարկաներում,
• հողերի գյուղտնտեսական գնահատում,
• անտառային ռեսուրսների արդյունավետ կառավարում։

Ամբիոնում աշխատում են մեծ փորձ ունեցող և առաջատար մասնագետներ, որոնք պարբերաբար անցնում են վերապատրաստումներ, ներգրավված են միջազգային ու տեղական դրամաշնորհային ծրագրերում, համատեղ աշխատում են արտադրության մեջ: Ամբիոնի դասախոսները հեղինակ են մենագրությունների, գիտական հոդվածների և ուսումնամեթոդական ձեռնարկների:

Ամբիոնն իր գործունեության ընթացքում հետևում է աշխատաշուկայի և մասնագիտությանը ներկայացվող պահանջներին, որից ելնելով, ըստ անհրաժեշտության, վերանայում և կատարելագործում է կրթական ծրագրերը: Պարբերաբար հանդիպումներ են կազմակերպվում ոլորտի ներկայացուցիչների, դասախոսների և ուսանողների միջև:

Քարտեզագրության և գեոմորֆոլոգիայի ամբիոնն իրականացնում է «Քարտեզագրություն և կադաստրային գործ» (առկա և հեռակա) բակալավրիատական և մագիստրոսական կրթական ծրագրերը։