ՇԱՐՈՒՆԱԿՎՈՒՄ Է ԵՊՀ ՏԱՂԱՆԴՆԵՐԻ ԲԱՑԱՀԱՅՏՈՒՄԸ. ՏԵՂԻ ՈՒՆԵՑԱՎ «ԱՐԻ ՄՐՑԵՆՔ» ԱՌԱՋՆՈՒԹՅԱՆ ՊԱՐԻ ՄՐՑՈՒՅԹԸ

Այսօր բեմում մրցեց 17 ֆակուլտետ, ժողովրդական ոճում՝ 7, իսկ ազատ ոճում՝ 10 մասնակից:

ԵՊՀ ՈւԽ մշակույթի հանձնաժողովի փոխնախագահ Էրիկ Հովհաննիսյանը մեզ հետ զրույցում նշեց, որ մրցույթի հիմնական նպատակն է բացահայտել համալսարանի տարբեր ֆակուլտետների տաղանդավոր ուսանողներին, որոնք հետագայում դառնալու են միջհամալսարանական տարբեր միջոցառումների և համերգների մասնակիցը: «Մենք ցանկանում ենք համալսարանական կյանքն ավելի հետաքրքիր դարձնել:  Մրցույթն արդեն ավանդական բնույթ է կրում, որին ամեն տարի ավելի շատ ուսանողներ են մասնակցում»,- հավելեց նա:

Նրա խոսքով, «Արի մրցենք» առաջնության շրջանակում նախատեսվում է անցկացնել նաև ասմունքի մրցույթ, մինչ այս արդեն տեղի են ունեցել պարի և գեղանկարչության մրցույթները:

Պարի միջֆակուլտետային մրցույթի ժյուրիի կազմում այսօր ընդգրկված էին «Պարող համալսարանական-2016»-ի հաղթող Զենֆիրա Եգանյանը, ԵՊՀ ՈւԽ մշակույթի հանձնաժողովի փոխնախագահ Էրիկ Հովհաննիսյանը և «Gold Star» պարային համույթի տնօրեն Արման Ղուկասյանը:

Մրցույթի առաջին փուլում մասնակիցները հանդես եկան ժողովրդական, իսկ երկրորդ փուլում՝ ազատ ոճի պարերով:  

Պարի մրցույթի արդյունքները պարզ կդառնան դեկտեմբերի 18-ին՝ «Արի մրցենք» առաջնության մրցանակաբաշխության ժամանակ:

ԵՊՀ ՈւԽ մշակույթի հանձնաժողովի փոխնախագահը նշեց, որ մյուս տարի նախատեսվում է անցկացնել միջհամալսարանական «Արի մրցենք» առաջնությունը:

Նադեժդա Տեր-Աբրահամյան