Ս. թ. հունիսի 26-ին տեղի ունեցավ Տեղեկատվական տեխնոլոգիաների կրթական և հետազոտական կենտրոնի (ՏՏԿՀ) շրջանավարտների դիպլոմների հանձնման հանդիսավոր արարողությունը:
Կենտրոնի շրջանավարտները, ստանալով ինֆորմատիկայի մագիստրոսի որակավորում, կհամալրեն տեղեկատվական համակարգեր նախագծողների ու մշակողների, տեղեկատվական տեխնոլոգիաների փորձագետների կամ համակարգեր մշակող խմբի ղեկավարների շարքերը:
Ավարտական միջոցառմանը ներկա էին ԵՊՀ գիտական հարցերի գծով պրոռեկտոր Ռաֆայել Բարխուդարյանը, ՏՏԿՀ կենտրոնի գիտական ղեկավար, ՀՀ ԳԱԱ ակադեմիկոս, ֆ.մ.գ.դ., պրոֆեսոր Սամվել Շուքուրյանը, դասախոսներ, ուսանողներ, հյուրեր:
Ռաֆայել Բարխուդարյանը, կարևորելով ՏՏ ոլորտի դերը արագ զարգացող աշխարհում, հույս հայտնեց, որ կենտրոնում ստացած հիմնարար գիտելիքները կնպաստեն շրջանավարտների մասնագիտական առաջխաղացմանը:
Կենտրոնի գիտական ղեկավար Սամվել Շուքուրյանը, շնորհավորելով արդեն գործընկերներ դարձած շրջանավարտներին, նշեց, որ իրենց համագործակցությունը կշարունակվի արդեն աշխատանքային գործունեության շրջանակում:
Հանդիսավոր արարողության ավարտին հանձնվեցին շրջանավարտների դիպլոմները:
Բարի երթ, սիրելի՛ շրջանավարտներ… Պատվո՛վ պահեք ձեր կոչումը՝ նպաստելով ՀՀ տեղեկատվական տեխնոլոգիաների ոլորտի զարգացմանը:
