"Personality and social behavior. Presentation of the results of the research entitled "Short-term and long-term consequences of COVID-19 in Armenia"

Ս․թ․ սեպտեմբերի 29-ին ԵՊՀ Պալեանների անվան դահլիճում տեղի ունեցավ «Անձ և սոցիալական վարք. COVID-19-ի կարճաժամկետ և երկարաժամկետ հետևանքները Հայաստանում» խորագրով հետազոտական նախագծի արդյունքների ամփոփմանը նվիրված գիտական քննարկումը:

Հետազոտությունը կատարվել է 2020-2023 թթ․ ՀՀ ԿԳՄՍՆ գիտության կոմիտեի տրամադրած գիտական դրամաշնորհի (20TTSH-070) շրջանակում։ Հետազոտական աշխատանքի գիտական ղեկավարը հ.գ.թ., դոցենտ, ԵՊՀ անձի հոգեբանության ամբիոնի վարիչ Նարինե Խաչատրյանն է, հետազոտողները՝  հ.գ.թ․ Սոնա Մանուսյանը, հ.գ.թ. Աննա Հակոբջանյանը և գիտաշխատող Անի Գրիգորյանը։ Հետազոտական աշխատանքներին մասնակցել են նաև օտարերկրյա գործընկերները։

Հետազոտական թիմի անդամները ներկայացրին եռամյա աշխատանքի արդյունքները:  Ն․ Խաչատրյանը խոսեց COVID-19 համավարակի դեմ պատվաստվելու և չպատվաստվելու վերաբերյալ եղած համոզմունքների և COVID-19-ի շուրջ դավադրապաշտական համոզմունքների կանխորոշիչների և հետևանքների մասին: Ա․ Հակոբջանյանի զեկուցումը վերաբերում էր համավարակի պայմաններում հոգեբանական բարեկեցությունը կանխորոշող գործոններին, իսկ Ա․ Գրիգորյանինը՝ համավարակի դեմ պայքարում Կառավարության և առողջապահության ինստիտուտների նկատմամբ վստահության դերի մասին։ Ս․ Մանուսյանը ներկայացրեց որակական ուսումնասիրությունների արդյունքները, որոնք վերաբերում էին համավարակի ընթացքում մարդկանց անձնական փորձառությանը, համոզմունքներին և տարբեր երևույթները վերաիմաստավորելուն։

Գիտական քննարկմանը ներկա էին հետազոտական նախագծի գործընկերները՝ Վարշավայի կարդինալ Ստեֆան Վիշինսկու համալսարանի միջմշակութային հոգեբանության կենտրոնի ղեկավար, պրոֆեսոր Մագդալենա Ժեմոյտել-Պիոտրովսկայան և առաջատար գիտաշխատող, պրոֆեսոր Յարոսլավ Պիոտրովսկին։

Պրոֆեսոր Ժեմոյտել-Պիոտրովսկայան բարձր գնահատեց հետազոտական թիմի կատարած մանրակրկիտ աշխատանքը, որի շրջանակում կիրառվել են ժամանակակից գրականության մեջ առկա մեթոդները:

Ամփոփիչ ելույթներով հանդես եկան նաև հոգեբանական գիտությունների թեկնածու Դավիթ Ամիրյանը և Անձի հոգեբանության ամբիոնի պրոֆեսոր, հոգեբանական գիտությունների դոկտոր Սվետլանա Հարությունյանը։  

Հյուրերն  արժևորեցին կատարված գիտահետազոտական աշխատանքը, որը միտված է հասարակության արդի խնդիրների լուծմանը, հանրային և պետական քաղաքականության մշակման համար ապացուցահենք տվյալների մշակմանը:

Քննարկմանը մասնակցում էին ՀՀ բարձրագույն կրթության և գիտության կոմիտեի, առողջապահության նախարարության հիվանդությունների վերահսկման և կանխարգելման ազգային կենտրոնի ներկայացուցիչներ, հոգեբաններ և ուսանողներ: