ԱՎԱՐՏՎԵՑ «ԿՐԹՈՒԹՅՈՒՆ ԵՎ ԿԱՐԻԵՐԱ EXPO 2021» ԵՌՕՐՅԱ ՑՈՒՑԱՀԱՆԴԵՍԸ. ԵՊՀ ՆԵՐԿԱՅԱՆՈՒՄ ԷՐ ԻՐ ՏԱՂԱՎԱՐՈՎ

Ցուցահանդեսի վերջին օրը ԵՊՀ տաղավարում ներկայացվեց Պատմության, Հայ բանասիրության, Փիլիսոփայության և հոգեբանության, Եվրոպական լեզուների և հաղորդակցության  ֆակուլտետների ու ԵՊՀ շրջանավարտների և կարիերայի կենտրոնի գործունեությունը:

 Մեզ հետ զրույցում ԵՊՀ պատմության ֆակուլտետի ուսանողուհի Սյունե Ստեփանյանը  ներկայացրեց Պատմության ֆակուլտետը. «Մեր ֆակուլտետի ապագա ուսանողները հնարավորություն ունեն ոչ միայն որակյալ բարձրագույն կրթություն ստանալու, այլ նաև իրենց ուսումն արտասահմանում շարունակելու և անգամ այնտեղի թանգարաններում աշխատելու»:

ԵՊՀ փիլիսոփայության և հոգեբանության ֆակուլտետի տաղավարում ուսանողները նույնպես  ներկայացնում էին ֆակուլտետի առաջարկած ուսումնական ծրագրերը, ինչպես նաև աշակերտներին պատմում էին մարդկային  հոգեբանության ուսումնասիրության կարևորությունը:

Ցուցահանդեսին մասնակից ԵՊՀ եվրոպական լեզուների և հաղորդակցության  ֆակուլտետի ուսանողներն այցելուներին իրազեկում էին օտար լեզուների ակադեմիական ուսումնասիրության կարևորության և ուսումը դրսում շարունակելու հնարավորությունների մասին:

Հիշեցնենք նաև, որ ԵՊՀ-ն երեք օրերի ընթացքում մշտական ցուցադրությամբ տրամադրել է բուհի մասին ընդհանուր և դիմորդներին անհրաժեշտ տեղեկատվություն, ինչպես նաև ցուցադրվել է աշխարհի հնագույն՝ 5000-ամյա կաշվե կոշիկի կրկնօրինակը (ԵՊՀ պատմության թանգարան):

Մեզ հետ զրույցում Լ. Ղարիբջանյանի անվան պատմության թանգարանի տնօրեն Հեղինե Գասպարյանը նշեց, որ շատ է կարևորում նմանօրինակ  ցուցահանդեսները, քանի որ դրանք հնարավորություն են ընձեռում աշակերտներին և ուսանողներին կողմնորոշվելու մասնագիտական ընտրության ու կրթական ծրագրերի ընտրության հարցերում:

Ցուցահանդեսի Կոնֆերանս սրահում ցուցադրվեցին նաև տեսանյութեր, որոնք պատմում էին  ԵՊՀ-ի միջազգային գործունեության և համագործակցությունների  մասին: