ՓՈԽԸՄԲՌՆՄԱՆ ՀՈՒՇԱԳՐԻ ՍՏՈՐԱԳՐՈՒՄ ԵՊՀ ԵՎՐՈՊԱԿԱՆ ԼԵԶՈՒՆԵՐԻ ԵՎ ՀԱՂՈՐԴԱԿՑՈՒԹՅԱՆ ՖԱԿՈՒԼՏԵՏԻ ՈՒ ՀՀ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ՄԻՋԵՎ

Հուշագրի ստորագրմանը ներկա էին ՀՀ արդարադատության նախարարի առաջին տեղակալ  Քրիստիննե Գրիգորյանը, ԵՊՀ եվրոպական լեզուների և հաղորդակցության ֆակուլտետի դեկան Գևորգ Բարսեղյանը, Թարգմանության տեսության և պրակտիկայի ամբիոնի վարիչ Ռուզաննա Ղազարյանը:

Հուշագրի ստորագրման ընթացքում կողմերն անդրադարձան բուհի և նախարարության միջև ստեղծվող փոխգործակցությանը՝ նոտարական թարգմանչի արտոնագրման տրամադրման գործընթացին, որը հնարավորություն է ընձեռում համապատասխան լեզվական քննություն հանձնելուց հետո ստանալու թարգմանչի արտոնագիր:

Քննության բավարար արդյունքների դեպքում արտոնագիրը տրամադրվում  է Արդարադատության նախարարության կողմից, իսկ քննությունների անցկացման գործընթացը վերապահվում է ԵՊՀ եվրոպական լեզուների և հաղորդակցության ֆակուլտետի թարգմանության տեսության և պրակտիկայի ամբիոնին:

ՀՀ արդարադատության նախարարի առաջին տեղակալ  Քրիստիննե Գրիգորյանը նշեց, որ կառավարության համար շատ կարևոր է ոլորտում ներգրավված թարգմանիչների  որակավորման գործընթացը, որը պետք է իրականացվի բարձր մակարդակով, որպեսզի ապահովվեն մասնագիտական հմտություններն ու կարողությունները:

«Այս տարիների ընթացքում կառավարությունը որոշակի դժվարություններ է ունեցել ճիշտ և որակյալ մասնագետների ընտրության հարցում, ուստի այժմ մեզ համար շատ կարևոր է ընտրել որակավորում ունեցող մասնագետների»,- ասաց նախարարի տեղակալը:

Նա շեշտեց նաև, որ նմանատիպ համագործակցության բացակայությունը Մայր բուհի հետ չօգտագործված ռեսուրս է համարում։

Քրիստիննե Գրիգորյանը շնորհակալություն հայտնեց Ռուզաննա Ղազարյանին ցուցաբերած նախաձեռնության համար. «Այս նախաձեռնությունը տեղի է ունենում մի այնպիսի ճիշտ  ժամանակահատվածում, երբ մենք ինքներս էլ փորձում էինք ելքեր գտնել և ավելի լավ մեխանիզմներ մշակել մասնագետների որակավորման գործընթացում»:

Նախարարի տեղակալը շնորհակալություն հայտնեց թիմին, հատկապես ՀՀ արդարադատության նախարարության աշխատակազմի իրավական ապահովման վարչության պետ Անահիտ Անտոնյանին, որն ակտիվ մասնակցություն է ունեցել հուշագրի կայացման գործում:

ԵՊՀ դեկան Գևորգ Բարսեղյանն էլ ընդգծեց, որ Եվրոպական լեզուների և հաղորդակցության ֆակուլտետն ամեն ինչ անելու է նախաձեռնությունը հավուր պատշաճի իրականացնելու համար:

«Ինչպես ամբիոնը, այնպես էլ ֆակուլտետը կօգտագործեն իրենց վիթխարի ներուժը գործընթացը որակով և թափանցիկ կազմակերպելու համար»,- վստահեցրեց նա:

Պարոն Բարսեղյանը ևս մեկ անգամ հավաստիացրեց, որ ամեն ինչ անելու է, որպեսզի   նախարարության և Մայր բուհի միջև արդյունավետ համագործակցությունը շարունակական բնույթ կրի:

Թարգմանության տեսության և պրակտիկայի ամբիոնի վարիչ Ռուզաննա Ղազարյանը ևս, ողջունելով նախաձեռնությունը, շնորհակալություն հայտնեց Արդարադատության նախարարության աշխատակիցներին՝ ի դեմս Քրիստիննե Գրիգորյանի: