June 29, 2021 | 12:42
Կրթություն
ԱՊԱԳԱ ԺՈՒՌՆԱԼԻՍՏՆԵՐԸ ԴԻՊԼՈՄՆԵՐ ՍՏԱՑԱՆ
ԵՊՀ Չարենցի անվան դահլիճում այսօր Ժուռնալիստիկայի ֆակուլտետի շրջանավարտների դիպլոմների հանձման արարողություն էր:
Ֆակուլտետի դեկան Նաղաշ Մարտիրոսյանը շնորհավորեց համալսարանականներին և նշեց, որ ուրախ կլինի նրանցից շատերին տեսնել գործընկերոջ դերում:
«Այսօրվանից դուք ԵՊՀ մի մասնիկն եք, իսկ համալսարանը ձեզ համար լինելու ու մնալու է որպես ձեր կենսագրության ամենաթանկ հատվածը: Դուք ներկայանալու եք իբրև ԵՊՀ շրջանավարտ և ներկայացնելու եք բուհը, որը դժվար ու բարդ առաքելություն է: Դա անսխալ ու անթերի լինելու պարտականություն ու կենսակերպ է: Եվ որքան դուք հեռանաք համալսարանից, այնքան այս տաճարի լույսը տեսանելի ու ընկալելի է լինելու ձեզ համար»,- ասաց Նաղաշ Մարտիրոսյանը:
Շրջանավարտներին շնորհավորեց նաև Նոր մեդիայի և հաղորդակցության ամբիոնի վարիչ Դավիթ Պետրոսյանը, որն ընդգծեց, որ ֆակուլտետի ու ամբիոնների դռները միշտ բաց են լինելու, իսկ դասախոսական կազմը միշտ պատրաստակամ է լինելու համագործակցելու և օգնելու համար:
«Նախորդ երկու տարվա ընթացքում մեզ երկու ճգնաժամ բաժին հասավ, որի ընթացքում առավել մեծ էր լրատվամիջոցների դերը: Ուզում եմ այն գիտակցումը, որով դուք կգնաք աշխատանքի, ավելի բարձր լինի, պետք է ավելի պարտավորված զգաք ձեզ, զգաք այս մասնագիտության կարևորությունը: Եթե ուզում եք հաջողել, գործեք մտքով, հավատացեք սրտով և ձեր ամբողջ կարողություններով առաջ գնացեք»,- նշեց ֆակուլտետի դասախոս, հեռուստամեկնաբան Քրիստինե Ալագուլյանը:
Մինչև դիպլոմների հանձնման արարողությունը միջոցառման մասնակիցները մեկ րոպե լռությամբ հարգեցին 44-օրյա պատերազմի զոհվածների և մասնավորապես Ժուռնալիստիկայի ֆակուլտետի 3 զոհված ուսանողների հիշատակը:
Այնուհետև շրջանավարտները հանդիսավոր արարողությամբ դիպլոմներ ստացան:
