1. Երևանի պետական համալսարանի (այսուհետ ԵՊՀ) նախապատրաստական դասընթացների գործունեության հիմնական նպատակը ՀՀ հանրակրթական հաստատությունների (դպրոցներ, քոլեջներ, վարժարաններ, նախնական մասնագիտական հաստատություններ) ավարտական դասարանների աշակերտների և սովորողների՝ բուհ ընդունվելուն նախապատրաստումն է, ինչպես նաև ուսումն այնտեղ շարունակելու համար ամուր հիմքերի ստեղծումը: ԵՊՀ նախապատրաստական դասընթացները կազմակերպում և համակարգում է մինչհամալսարանական կրթության կենտրոնի (այսուհետ Կենտրոն) նախապատրաստական դասընթացների բաժինը (այսուհետ Բաժին):

2. Աշակերտները և սովորողները նախապատրաստական դասընթացների ունկնդիր ձևակերպվելու համար ներկայացնում են հետևյալ փաստաթղթերը. 

• անձնագիր (ծննդյան վկայական) 
• 2 լուսանկար 
• ուսման սահմանված վճարի անդորագիր

3. Նախապատրաստական դասընթացների ունկնդիրների համար կազմակերպվում են երկարաժամկետ (ութամսյա) և արագացված (երկամսյա) դասընթացներ:

4. Ութամսյա նախապատրաստական դասընթացները կազմակերպվում են յուրաքանչյուր ուստարվա հոկտեմբեր-մայիս, իսկ արագացված դասընթացները՝ ապրիլ-մայիս ամիսների ընթացքում: Նախապատրաստական դասընթացների ուսման վարձը սահմանվում է ԵՊՀ գիտական խորհրդի կողմից՝ յուրաքանչյուր ուսումնական տարվա համար:

5. Երկարաժամկետ նախապատրաստական դասընթացների ունկնդիրների գիտելիքների նախնական մակարդակին համապատասխան խմբեր ձևավորելու նպատակով բաժինը բոլոր հանրակրթական առարկաներից նախապես անցկացնում է թեստավորում:

6. Նախապատրաստական դասընթացներում ուսուցումն իրականացվում է դասախոսությունների, գործնական աշխատանքների և խորհրդատվությունների ձևով:

7. Ուսումնական գործընթացում ունկնդիրների գիտելիքները վերահսկելու համար կիրառվում են հետևյալ ձևերը՝ ընթացիկ ստուգումներ ուսման ընթացքում և ավարտական քննություններ:

8. Ունկնդիրների գիտելիքների մակարդակը որոշվում է 20 միավորանոց համակարգով: Ուսումնական դասընթացը հաջողությամբ ավարտած ունկնդիրներին տրվում է սահմանված նմուշի վկայական՝ ավարտական քննությունների արդյունքներով:

9. Նախապատրաստական դասընթացներից ունկնդիրներին հեռացնելու և վերականգնելու կարգը սահմանվում է բաժնի ներքին կանոններով՝ հաստատված ուսումնական աշխատանքների գծով պրոռեկտորի կողմից:

10. ԵՊՀ-ի և ունկնդիրների (նրանց ուսման գործուղած կամ նրանց ներկայացնող անձանց) հարաբերությունները կարգավորվում են կրթական ծառայությունների մատուցման պայմանագրով:

11. Նախապատրաստական դասընթացների ունկնդիրներն իրավունք ունեն՝

• ստանալ որակյալ կրթություն՝ համաձայն ուսուցման ընտրված ծրագրի,
• օգտվել ԵՊՀ նյութատեխնիկական բազայի ընձեռած հնարավորություններից,
• ընթացքում փոխել նախապատրաստման ուղղվածությունը:

12. Նախապատրաստական դասընթացների ունկնդիրները պարտավոր են՝

• սահմանված ժամկետներում վճարել ուսման վարձը,
• սահմանված ժամկետներում կատարել բոլոր այն առաջադրանքները, որոնք նախատեսված են կրթական ծրագրերով,
• տիրապետել տեսական գիտելիքներին և գործնական հմտություններին՝ ընտրված հանրակրթական առարկաներից և դասընթացներից,
• պահպանել ԵՊՀ-ի կարգապահական կանոնները:

13. Նախապատրաստական դասընթացները վարում են ԵՊՀ պրոֆեսորադասախոսական կազմի ներկայացուցիչները: Նախատեսված լսարանային ժամերը հաշվառվում են ամբիոնային բեռնվածություններում կամ իրականացվում ժամավճարային հիմունքներով:

14. Նախապատրաստական դասընթացների կրթական ծրագրերի բովանդակությունն ու որակը ապահովելու նպատակով, ըստ հանրակրթական առարկաների, ձևավորվում է փորձագիտական խորհուրդ, որը հրամանագրվում է ԵՊՀ ուսումնական աշխատանքների գծով պրոռեկտորի կողմից:

15. Կրթական գործընթացի մասնակիցները պարտավոր են պահպանել Բաժնի գործունեությունը կանոնակարգող նորմատիվ ակտերի, ինչպես նաև ԵՊՀ-ի հետ կնքված պայմանագրերի պահանջները: