ԵՊՀ ռեկտորի ելույթը ԵՊՀ շրջանավարտների ավարտական հանդիսավոր միջոցառմանը

Սիրելի՛ շրջանավարտներ, սիրելի՛ համալսարանականներ, հարգելի՛ գործընկերներ ու հյուրեր,

այսօր նշանակալի իրադարձություն է ԵՊՀ կյանքում․ մենք հավաքվել ենք մեր սիրելի համալսարանի ջերմ ու հյուրընկալ գրկում՝ ամփոփելու անցած տարիների աշխատանքը, յուրաքանչյուր շրջանավարտի մտքի ու երևակայության բացառիկ ճանապարհորդությունը և ազդարարելու նրանց մասնագիտական կյանքի նոր շրջափուլի մեկնարկը։

Սիրելի՛ շրջանավարտներ, այսօրվա միջոցառումը ձեր ուսումնառության արդյունքների ամրագրումն է։ Այս տարիների ընթացքում դուք ունեցել եք բազմաթիվ ձեռքբերումներ, հիշարժան օրեր, անմոռանալի հիշողություններ, զգացել եք գիտելիքի բացահայտման և միասին սովորելու ու մտածելու  բերկրանքը։

Երևանի պետական համալսարանում սովորելու ընթացքում դուք ոչ միայն ձեռք եք բերել գիտելիքներ ձեր ընտրած ոլորտներում, այլև զարգացրել եք կարևոր հմտություններ ու անընդհատ փոփոխվող աշխարհում արագ կողմնորոշվելու կարողություն, որոնք կօգնեն ձեզ ձեր ապագայի ձևավորման և մարտահրավերներին դիմակայելու գործում։

Սիրելի՛ շրջանավարտներ, այսօր ես ցանկանում եմ, որ մի պահ մտածեք ձեր անցած ճանապարհի մասին և իմանաք, որ ձեր ձեռքբերումները վկայում են ձեր վճռականության ու գերազանցության հանդեպ անսասան նվիրվածության մասին, և դրա համար է, որ մենք այսօր նշում ենք ոչ միայն ձեր ակադեմիական նվաճումները, այլև վկայակոչում բնավորության այն հատկանիշներն ու արժեքները, որոնք դուք ձևավորել եք Երևանի պետական համալսարանում ուսանելու ընթացքում:

Այդ կարևոր գործում իրենց մեծ ներդրումն ունեն ձեր դասախոսներն ու կրթության կազմակերպիչները, և ես ցանկանում եմ բոլորիս անունից խորին շնորհակալություն հայտնել նրանց։

Ես ձեզ կոչ եմ անում վստահությամբ ու լավատեսությամբ ընդունել այն մարտահրավերներն ու հնարավորությունները, որոնք սպասում են ձեզ առջևում։ Իմացե՛ք, որ աշխարհին անհրաժեշտ են ձեր գիտելիքը, ձեր միտքն ու եռանդը: Ձեզնից յուրաքանչյուրը կարող է դրական փոփոխություններ անել մեր երկրի և ամբողջ աշխարհի համար։

Կրթական այս շրջափուլի ավարտն ամենևին էլ չի նշանակում, որ պետք է դադարել սովորելուց: Շարունակե՛ք համալրել ձեր գիտելիքների պաշարը, փնտրե՛ք հնարավորություններ աճելու, նոր ոլորտներ ուսումնասիրելու և ձեր անձնական ու մասնագիտական զարգացումը շարունակելու համար:

Մշտապես հիշե՛ք ու ամո՛ւր պահեք այն կապերը, որոնք ձևավորել եք այստեղ: Ձեր դասախոսներն ու համակուրսեցիները ձեր դաշնակիցներն ու համագործակիցներն են լինելու առջևում սպասվող ուղիներով անցնելիս։ Հպարտացե՛ք ձեր ձեռքբերումներով, և թող ձեր երազանքները ոգեշնչեն ձեզ։

Այսօր 40 շրջանավարտներ հանդիսավոր պայմաններում ստանալու են իրենց դիպլոմները։ Ու թեև նրանց ընտրությունը պայմանավորված է գրանցած առաջադիմությամբ ու գիտական ձեռքբերումներով, այնուամենայնիվ այս բեմ բարձրացող յուրաքանչյուր ուսանող ներկայացնելու է ոչ միայն իրեն, այլև իր տաղանդաշատ ու աշխատասեր ընկերներին։

Սիրելի՛ շրջանավարտներ, Երևանի պետական համալսարանի ողջ անձնակազմի անունից մաղթում եմ ձեզ հաջողություն ձեր հետագա բոլոր նախաձեռնություններում: Թող ձեր ապագան լցված լինի անսահման հնարավորություններով ու անթիվ ձեռքբերումներով։

Իմացե՛ք, որ դուք ունեք հավերժական կոչում․ դուք համալսարանական եք և միշտ կմնաք Երևանի պետական համալսարան ընտանիքի անբաժանելի մասնիկն ու անդամը:

Ելույթի ամբողջական տեսանյութը՝ այստեղ՝ www.facebook.com։