ԵՊՀ ռեկտորի ողջույնի խոսքը
Սիրելի՛ առաջինկուրսեցիներ, բարի գալուստ Երևանի պետական համալսարան։ Դուք կրթական ու գիտական փառավոր պատմություն ունեցող համալսարանի ուսանող եք և համալսարանական մեծ ընտանիքի անդամ։
Ուսումնառության ընթացքում այստեղ ծանոթանալու եք ավելի քան մեկդարյա հարուստ պատմություն ունեցող համալսարանի գեղեցիկ ավանդույթներին, ստանալու եք Հայաստանում լավագույն կրթությունը, ձեռք եք բերելու նոր հմտություններ, գիտական ասպարեզում կատարելու եք ձեր առաջին քայլերը, բացահայտելու եք ձեր ներուժը, սովորելու եք ինքնուրույն մտածել, կարողանալու եք փնտրել ստեղծագործական լուծումներ, հասկանալու եք՝ ինչպես կյանքի կոչել ձեր գաղափարներն ու լիարժեք ձևավորվել որպես անհատ ու քաղաքացի։
Առաջինկուրսեցիների հանդիսավոր մուտքը համալսարան
Բարի գալուստ ԵՊՀ
Սիրելի՛ ուսանողներ, դուք արդեն ԵՊՀ մեծ ընտանիքի անդամ եք, ինչի համար ջերմորեն շնորհավորում ենք ձեզ։ Այստեղ առկա են բոլոր հնարավորությունները ոչ միայն որակյալ կրթություն ստանալու, այլև ուսանողական անմոռանալի տարիներ անցկացնելու և երազանքներին հասնելու համար։
Ձեր ուսումնառությունն առավել արդյունավետ կազմակերպելու նպատակով ուսումնական տարվա առաջին շաբաթվա ընթացքում դուք ծանոթանալու եք կրթական գործընթացին, ձեր ֆակուլտետի կառուցվածքին, համալսարանական ստորաբաժանումներին և ուսանողական տարիներին ընձեռվող հնարավորություններին։
Բացի դրանից՝ ձեզ տրվելու են ուսանողական քարտեր, որոնք ստանալուց հետո կկարողանաք օգտվել ԵՊՀ գրադարանից․ ի դեպ, այն հանրապետության ամենամեծ գրադարաններից մեկն է։ Դուք ունենալու եք նաև ձեր համալսարանական էլհասցեն, որի միջոցով ստանալու եք տեղեկություններ ուսումնական ամբողջ գործընթացի վերաբերյալ և իրազեկվելու կարևոր նորությունների ու համալսարանում տեղի ունեցող միջոցառումների մասին։
Ուսանողական կյանքն առավել հետաքրքիր կազմակերպելու, ոչ ֆորմալ կրթության հարթակներից օգտվելու, ձեր իրավունքներն ու պարտականություններն առավել արդյունավետ իրացնելու, հետազոտություններ կատարելու, մշակութային, սպորտային միջոցառումների մասնակցելու և ժամանցը հետաքրքիր կազմակերպելու համար դուք հնարավորություն ունեք անդամագրվելու ԵՊՀ-ում գործող ուսանողական կառույցներին, ակումբներին ու կենտրոններին, մասնավորապես Ուսանողական խորհրդին, Ուսանողական գիտական ընկերությանը, Շառլ Ազնավուրի անվան մշակույթի կենտրոնին։
Համալսարանական կյանքին վերաբերող բոլոր անհրաժեշտ տեղեկությունները դուք կգտնեք մեր կայքէջում, իսկ կարևոր նորություններն ու հայտարարությունները բաց չթողնելու համար չմոռանա՛ք հետևել սոցիալական ցանցերի մեր պաշտոնական էջերին ու ձեր էլեկտրոնային փոստարկղերին։
Մաղթում ենք հաջողություն։
