ԵՊՀ-ում գործում է օտարերկրյա քաղաքացիների համար նախատեսված Նախապատրաստական դասընթացների բաժին (ք. Երևան, Աբովյան 52ա, Հայ բանասիրության ֆակուլտետի 1-ին հարկ, 115 սենյակ, հեռ.՝ (+374 60) 710 679, (+374 96) 710 679), որտեղ հնարավորություն ունեն ընդունվելու այն օտարերկրացիները, որոնց կրթական մակարդակը համապատասխանում է ՀՀ միջնակարգ դպրոցի ծրագրին, այդ թվում նաև նրանք, ովքեր բավարար չափով չեն տիրապետում հայերենին:

Օտարերկրյա ուսանողները, ընդհանուր կրթության գիտելիքների (մաթեմատիկա, պատմություն, քիմիա, կենսաբանություն, աշխարհագրություն, օտար լեզու և այլն) ամրապնդմանը զուգահեռ, սովորում են հայերեն կամ լրացնում հայոց լեզվի իրենց իմացությունը:

Ուսումնական տարվա վերջում օտարերկրյա այն ուսանողները, որոնք հաջողությամբ հանձնել են քննությունները, ընդունվում են համապատասխան ֆակուլտետներ:

Օտարերկրյա քաղաքացիները ԵՊՀ դիմելու համար պետք է ներկայացնեն հետևյալ փաստաթղթերը․

1) դիմում՝ Հայաստանի Հանրապետության կրթության, գիտության մշակույթի և սպորտի նախարարի անունով (տրամադրում է նախարարությունը),
2) հարցաթերթիկ՝ տրամադրված նախարարության կողմից,
3) բժշկական տեղեկանք ընդհանուր առողջական վիճակի մասին (տեղեկանքը կարող են տալ նաև Հայաստանի Հանրապետության բժշկական կազմակերպությունները),
4) անձնագրի կամ ծննդյան վկայականի բոլոր էջերի պատճենները և մկրտության վկայականը,
5) կրթական աստիճանի ավարտական փաստաթղթի պատճենը,
6) 4 լուսանկար (3x4 չափսի),
7) ինքնակենսագրություն (CV)՝ հայերենով, ռուսերենով կամ անգլերենով,
8) հետբուհական մասնագիտական կրթություն (PhD) ստանալու համար՝ ընտրած մասնագիտության թեմայով գիտական ռեֆերատ՝ 20 էջի սահմանում (հայերենով, ռուսերենով կամ անգլերենով):

Հայաստանի Հանրապետության դիվանագիտական ներկայացուցչությունը փաստաթղթերն ընդունում է քննարկման, եթե առկա է օտարերկրյա պետությունում հյուպատոսական վավերացում, և եթե Հայաստանի Հանրապետության օրենքներով կամ միջազգային պայմանագրերով այլ դրույթներ նախատեսված չեն: