ԵՊՀ ռեկտորի շնորհավորական ուղերձը Գիտության համաշխարհային օրվա կապակցությամբ

Աշխարհում այսօր նշվում է Գիտության համաշխարհային օրը, որը հրաշալի առիթ է` ևս մեկ անգամ ընդգծելու գիտության կարևորությունն ու գիտնականների ներդրումը մարդկության պատմության զարգացման գործում։

ԵՊՀ-ում մենք հավատում ենք գիտելիքի ուժին ու գիտության ընձեռած հնարավորություններին, և հենց դրա համար էլ մեր սահմանած հիմնական նպատակներից մեկը գիտահետազոտական առաջատար բուհ դառնալն է, որտեղ ձևավորված միջավայրը հնարավորություն է տալիս ստեղծագործելու ու շարունակաբար առաջ մղելու գիտելիքի սահմանները։

Մեր նպատակի իրագործման ճանապարհին հետազոտական ենթակառուցվածքներում ներդրումներ կատարելով, շարունակական ուսուցման ու բացահայտումների մշակույթը խթանելու հանձնառությամբ՝ մենք ձգտում ենք ԵՊՀ-ն դարձնել այնպիսի վայր, որտեղ ուսանողները ոչ միայն գիտելիք ստացողներ են, այլև նոր գիտելիքների ստեղծման ակտիվ մասնակիցներ։

Խորհրդանշական այս օրվա կապակցությամբ շնորհավորում ու շնորհակալություն եմ հայտնում մեր բոլոր գիտնականներին ու հետազոտողներին։ Գիտությունը սահմաններ չի ճանաչում, և ես վստահ եմ, որ ձեր աշխատանքն ու գրանցած արդյունքները շարունակելու են դրական ազդեցություն ունենալ ոչ միայն մեր, այլև համաշխարհային հանրության վրա: