Մայիսի 16-ին տեղի կունենա «ԲանՈՒԳործ․ ԵՊՀ էքսպո-2023»-ը։ Երևանի պետական համալսարանի ծննդյան 104-ամյակին նվիրված լայնամասշտաբ այս միջոցառման հիմնական նպատակն է ներկայացնել կրթական և աշխատանքային հնարավորություններ, ապահովել արդյունավետ հաղորդակցություն գործատուների, շրջանավարտների և ուսանողների միջև, ինչպես նաև համապարփակ թեմատիկ քննարկումների միջոցով վերհանել կրթական համակարգի և գործատուների հետ առկա համագործակցության առանձնահատկությունները, խնդիրներն ու զարգացման հեռանկարները։
Երևանի պետական համալսարանը՝ որպես ՀՀ խոշորագույն բուհ, տարիներ շարունակ բազմաթիվ մասնագիտություններով աշխատաշուկային է տվել որակյալ ու բանիմաց կադրեր։ Համալսարանն է կրթության միջոցով դեպի աշխատաշուկա տանող ճանապարհը: Արդի ժամանակաշրջանում կրթությունից աշխատաշուկա սահուն անցումն ապահովելու և տեղի ունեցող արագ զարգացումներին համընթաց քայլելու համար շատ կարևոր է կրթական միջավայրի և աշխատաշուկայի արդյունավետ փոխգործակցությունը:
«ԲանՈՒԳործ․ ԵՊՀ էքսպո-2023»-ն ընձեռում է բացառիկ հնարավորություն՝ մեկ հարկի տակ հավաքելով դիմորդներին, ուսանողներին, շրջանավարտներին, կրթական ծառայություններ մատուցող համալսարանական ստորաբաժանումները և գործատուներին։ «ԲանՈՒԳործ»-ի շրջանակում ուսանողները հնարավորություն կունենան հանդիպելու իրենց ապագա գործատուներին, դիմորդները՝ ծանոթանալու մրցունակ կրթական ծրագրերին, իսկ գործատուները՝ ներկայացնելու իրենց գործունեությունն ու ընձեռած աշխատանքային հնարավորությունները։
Ի՞նչ է «ԲանՈՒԳործ»-ը
«ԲանՈՒԳործ»-ը տաղավարների ամբողջություն է, որտեղ հայաստանյան լավագույն կազմակերպություններն այցելուներին ներկայացնում են տվյալ կազմակերպության գործունեությունը, առաջարկվող հնարավորություններն ու իրենց կորպորատիվ մշակույթը, իսկ կրթական ծառայություններ մատուցող համալսարանական ստորաբաժանումները՝ իրենց գործունեությունը, ծրագրերը, կրթական և աշխատանքային հնարավորությունները։
Ընդհանուր միջոցառումը բաղկացած է մի քանի բաղադրիչից՝
- կարիերայի տոնավաճառ,
- կրթության տոնավաճառ,
- «ԲանՈՒԳործ 2023․ կրթության և կարիերայի հնարավորությունները Հայաստանում» խորագրով կոնֆերանս,
- աշխատարաններ (արագ դասընթացներ, սիմուլյացիոն խաղեր, հարցազրույցներ և այլն),
- ԵՊՀ պատմական անդրադարձ․ լուսանկարների ցուցահանդես,
- գրքերի ցուցադրություն և հանդիպումներ հեղինակների հետ,
- ԵՊՀ գերազանցության մրցանակաբաշխություն և տոնական համերգ։
ԵՊՀ կենտրոնական մասնաշենքի դիմային հատվածում տեղակայվելու են գործատուների տաղավարները, իսկ ԵՊՀ գրադարանին հարող տարածքում՝ կրթական ծառայություն մատուցող ստորաբաժանումների տաղավարները։
Ցուցահանդեսի այս երկու հատվածները փոխկապակցված են, քանի որ առաջարկվող աշխատանքային հնարավորություններն ուղղակիորեն կապվում են ներկայացվող կրթական ծրագրերին։ Մասնավորապես QR կոդի միջոցով, որը առկա է լինելու ցուցահանդեսի ամբողջ տարածքի տարբեր հատվածներում, ԵՊՀ կայքէջում առանձնացված՝ միջոցառման էջում ներկայացվելու է, թե յուրաքանչյուր գործատու ինչ կրթական ծրագրերով սովորող մասնագետների համար ունի աշխատանքային հնարավորություններ։ Ընդ որում, յուրաքանչյուր գործատու հնարավորություն ունի առաջարկելու աշխատանքային հնարավորություններ մի քանի կրթական ծրագրի համար, իսկ կրթական ծառայություն մատուցող ստորաբաժանումներն էլ իրենց հերթին հնարավորություն ունեն տարբեր գործատուների համար անհրաժեշտ մասնագետներ պատրաստող ծառայություններ ներկայացնել։ Միջոցառման էջում բոլոր գործընկերները հնարավորություն կունենան ներկայացնելու իրենց կազմակերպությունը։
ԵՊՀ մեծ դահլիճում բաց մասնակցությամբ տեղի է ունենալու «ԲանՈՒԳործ 2023․ կրթության և կարիերայի հնարավորությունները Հայաստանում» խորագրով կոնֆերանսը։
ԵՊՀ կենտրոնական մասնաշենքի և գրադարանի նախասրահների հատվածներում լինելու են աշխատարան, պատմական լուսանկարների ցուցահանդես և գրքերի ցուցադրություն։ Աշխատարանի շրջանակում տեղի են ունենալու CV կազմելու ու որոշակի հմտություններ ձեռք բերելու վերաբերյալ արագ դասընթացներ, աշխատաշուկայում սեփական տեղը գտնելու և մասնագիտական կողմնորոշման հետ կապված թեստեր, ինչպես նաև սիմուլյացիոն հարցազրույցներ, որոնք օգնելու են ուսանողներին գնահատել սեփական կարողություններն ու հմտությունները, հասկանալ գործատուի պահանջները և այլն։
ԵՊՀ կենտրոնական մասնաշենքի նախասրահում կրթական ծառայություններ մատուցող, զարգացման ծրագրեր առաջարկող տեղական ու միջազգային կազմակերպությունները ներկայացնելու են իրենց գործունեությունը։
Այդ օրը տեղի է ունենալու նաև ԵՊՀ գիտական խորհրդի հոբելյանական նիստ, որի ընթացքում կանցկացվի ԵՊՀ գերազանցության մրցանակաբաշխությունը, ինչին կհաջորդի տոնական համերգը՝ YSU Band-ի և հրավիրված երաժշտական խմբերի մասնակցությամբ։
Ինչո՞ւ մասնակցել «ԲանՈՒԳործ»-ին
«ԲանՈՒԳործ»-ի ժամանակ Դուք հնարավորություն կունենաք՝
- մեկ օրվա ընթացքում շփվելու ավելի քան 7000 մասնակիցների հետ,
- հաղորդակցվելու ինչպես ուսանողների, այնպես էլ աշխատաշուկայում առաջատար դիրք ունեցող բազմաթիվ կազմակերպությունների հետ,
- ծանոթանալու առաջարկվող կարիերայի հնարավորություններին,
- կոնֆերանսի շրջանակում լսելու տարբեր շրջանակների ներկայացուցիչների և ոլորտային փորձագետների արժեքավոր տեսակետները, մասնակցելու ընդգրկուն թեմատիկ քննարկումների։
