Ս․թ․ մարտի 15-ին ԵՊՀ Շառլ Ազնավուրի անվան մշակույթի կենտրոնի նախաձեռնությամբ Պարույր Սևակի տուն-թանգարանում տեղի ունեցավ միջոցառում՝ նվիրված գրողի ծննդյան 100-ամյակին:
Միջոցառմանը ողջույնի խոսքով հանդես եկավ բանասիրական գիտությունների թեկնածու, դոցենտ, ԵՊՀ հայ բանասիրության ֆակուլտետի դեկան Արշալույս Գալստյանը: Այնուհետև բանասիրական գիտությունների դոկտոր Սամվել Մուրադյանը դասախոսություն կարդաց Պարույր Սևակի մասին:
ԵՊՀ Շառլ Ազնավուրի անվան մշակույթի կենտրոնի «Համալսարանական» թատրոն ստուդիայի (գեղ. ղեկավար՝ Կարինե Դավթյան) սաների կատարմամբ ներկայացվեց Սևակի ստեղծագործությունների հիման վրա ստեղծված գրական կոմպոզիցիա: Այնուհետև կենտրոնի երգչախումբը (խմբավար՝ Ռուբեն Կարասեֆերյան, գեղարվեստական ղեկավար՝ Կարեն Սարգսյան) կատարեց Պարույր Սևակի բանաստեղծությունների հիման վրա գրված երկու ստեղծագործություն:
Միջոցառման ավարտին ԵՊՀ Շառլ Ազնավուրի անվան մշակույթի կենտրոնի տնօրեն Կարինե Դավթյանը Պարույր Սևակի տուն-թանգարանին նվիրեց ԵՊՀ հրատարակչության կողմից տպագրված «Գրական համալսարան» և Սամվել Մուրադյանի «Հայ նոր գրականություն» գրքերը:
