Ամերիկագիտություն

«Ամերիկագիտություն» մագիստրոսական կրթական ծրագիրն իրականացվում է Հայաստանում ԱՄՆ դեսպանատան (ԱՄՆ պետքարտուղարության) կողմից ֆինանսավորվող «Ամերիկյան հետազոտություններ» ծրագրի շրջանակում՝ 2020 թ. ԵՊՀ-ում ստեղծված ամերիկյան հետազոտությունների կենտրոնի կողմից։

«Ամերիկագիտություն» մագիստրոսական կրթական ծրագիրն իրականացվում է Արիզոնայի պետական համալսարանի հետ համագործակցության շրջանակում՝ ներառյալ դասավանդողների կարգավիճակում ASU (School of Social Transformation) դասախոսական կազմի, ինչպես նաև «Fulbright» ծրագրերի ASU հետազոտողների և դասախոսների ընդգրկմամբ։ Ավելին՝ կրթական ծրագրի դասախոսական կազմի ներկայացուցիչները մեծ ծրագրի մեկնարկի նախաշեմին մեկնել էին Արիզոնայի պետական համալսարան՝ անցնելու վերապատրաստման հատուկ ծրագիր և մշակելու «Ամերիկագիտություն» կրթական ծրագրում ընդգրկված դասընթացները։

«Ամերիկագիտություն» մագիստրոսական կրթական ծրագրի ընդունելության քննության ձևաչափը՝ բանավոր։

2024-2025 ուսումնական տարվա ընդունելության ժամանակացույց

Առաջին փուլ

• Փաստաթղթերն ընդունվում են 2024 թ. հունիսի 1-28-ը՝ մինչև ժամը 18:00-ն:
• Ընդունելության քննություններն անցկացվելու են 2024 թ. հուլիսի 2-ին:

Երկրորդ փուլ

• Փաստաթղթերն ընդունվում են 2024 թ. հուլիսի 3-ից օգոստոսի 16-ը՝ մինչև ժամը 18:00-ն:
• Ընդունելության քննություններն անցկացվելու են 2024 թ. օգոստոսի 22-ին և 23-ին:

Ծրագրի նպատակը

Առաջարկվող մագիստրոսական կրթական ծրագիրը ՀՀ բարձրագույն կրթության համակարգում առաջինն է իր տեսակի մեջ։ Վերջինիս հիմնական նպատակն է պատրաստել այնպիսի մասնագետներ, որոնք կկարողանան ձեռք բերված գիտելիքներն ու կարողությունները գործնականում կիրառել ԱՄՆ-ի հետ կապված տարբեր ոլորտներում՝ ամերիկյան քաղաքականություն և տնտեսություն, մեդիադաշտ և հանրային կարծիք, ԱՄՆ կառավարական համակարգ և հանրային քաղաքականություն, մշակույթ, աշխարհագրություն և այլն:

Առավելությունները

Ամերիկագիտությունը (American Studies)՝ որպես առանձին գիտակարգ և մագիստրոսական կրթական ուղղություն, վաղուց արդեն կայացած կրթական և ակադեմիական ոլորտ է։

Ծրագրի առավելություններն են՝

- մասնագիտական կարիերայի հնարավորությունների ստեղծում միջազգային հարաբերությունների բնագավառում, ԱՄՆ-ի հետ կապված կամ ամերիկյան հովանու ներքո գործող միջազգային կազմակերպություններում, ամերիկյան մշակութային և հասարակական կառույցներում, ինչպես նաև ամերիկյան բիզնեսին և կորպորատիվ ինստիտուտներին առնչվող ոլորտներում,

- պրակտիկայի հնարավորություններ,

- կրթաթոշակի շնորհման հնարավորություն ուսման վարձի մասնակի փոխհատուցման նպատակով,

- Արիզոնայի պետական համալսարանի կողմից իրականացվող հավաստագրային կարճաժամկետ կրթական ծրագրին մասնակցելու հնարավորություն (Certificate Program)։

Ամերիկյան հետազոտությունների կենտրոնի առաջարկած «Ամերիկագիտություն» կրթական ծրագրի հիմնական դասընթացներն ունեն հետևյալ ուղղվածությունները․

• ԱՄՆ արտաքին քաղաքականություն,

• Մերձավոր Արևելքում և հարակից տարածքներում ամերիկյան ռազմավարական շահեր,

• ԱՄՆ էներգետիկ քաղաքականություն և շրջակա միջավայր,

• ԱՄՆ Կառավարություն և հանրային քաղաքականություն,

• քաղաքատնտեսություն, բիզնես և ԱՄՆ կորպորացիաներ,

• ամերիկյան հասարակություն, տարածաշրջանային քաղաքականություն և ամերիկահայ սփյուռք,

• ԱՄՆ Սահմանադրություն և դատական համակարգ,

• ԱՄՆ հանրային և սոցիալական լրատվամիջոցներ և զանգվածային հաղորդակցություն,

• հասարակագիտության հետազոտության մեթոդներ,

• մասնագիտական (ակադեմիական) գրագրություն:

Կարիերայի հնարավորությունները

«Ամերիկագիտություն» մագիստրոսական կրթական ծրագրի շրջանավարտները կարող են աշխատել ԱՄՆ-ին առնչվող տարբեր բնագավառներում։

Կոնտակտներ

(+374 91) 541 119

aglyan@ysu.am