Ժամանակահատված
Ընդհանուր տվյալներ
D ուռուցիկ մարմնի վերականգնման հարցը՝ ըստ նրա հավանականային բնութագրիչների, հանդիսանում է ստոխաստիկ երկրաչափության արդի խնդիրներից մեկը։ Այս համատեքստում գրականության մեջ հանդիպում են զանազան հավանականային բնութագրիչներ՝ նկարագրված պատահական մեծություններով, որոնք, օրինակ, առնչվում են D-ի՝ փոքր չափողականության հատույթների կամ՝ D-ից վերցրված կետերի զույգերի հետ։ Համապատասխան խնդիրները հիմնարար են երկրաչափական տոմոգրաֆիայի և ստերեոլոգիայի ոլորտում և, օրինակ, կիրառելի են բժշկական ախտորոշման մեջ (տես [1-2])։ Մասնավորապես, Մաթերոնի վարկածով (տես [3-4]) պայմանավորված, սահմանափակ ուռուցիկ տիրույթների ճանաչման խնդիրը՝ ըստ նրա լարի երկարության բաշխման (ԼԵԲ) ֆունկցիայի, դարձավ ակտիվ հետազոտության առարկա։ Վարկածն ուսումնասիրվել է [5-10] աշխատանքներում։ ԼԵԲ ֆունկցիայի և նրա բացահայտ տեսքի վերաբերյալ վերջին շրջանի մի շարք արդյունքներ արտացոլված են [11-20]-ում։ D-ից հավասարաչափ ու անկախ ընտրված երկու կետերի հեռավորության խտության ֆունկցիան ուսումնասիրված է [21-22]-ում։ Հիմնվելով վերջին տարիների հետազոտությունների վրա և նոր արդյունքներ ստանալու համար հավանականային ու վիճակագրական նոր մեթոդներ մշակելով՝ այս նախագծով մենք նպատակ ունենք առաջընթաց ապահովել R^n-ում ուռուցիկ մարմինների ճանաչման հիմնահարցում։ Ոլորտը խոստումնալից է ինչպես տեսական, այնպես էլ փորձարարական տեսանկյուններից։
