«ԿԱՏԱՐԵ՛Ք ՁԵՐ ՄԱՍՆԱԳԻՏԱԿԱՆ ԼԱՎԱԳՈՒՅՆ ԸՆՏՐՈՒԹՅՈՒՆԸ». ՈՒՍԱՆՈՂՆԵՐԸ ՆԵՐԿԱՅԱՑՆՈՒՄ ԵՆ «PR» ՄԱԳԻՍՏՐՈՍԱԿԱՆ ԾՐԱԳԻՐԸ

Մեզ հետ զրույցում միջոցառման կազմակերպիչ, «Հասարակայնության հետ կապեր» մագիստրոսական ծրագրի առաջին կուրսի ուսանող Տաթևիկ Ավանեսյանն ասաց, որ միջոցառման նպատակն է բակալավրիատի ուսանողներին և մյուս ցանկացողներին ներկայացնել PR-ը բոլոր տեսանկյուններից, տեղեկացնել դասավանդվելիք առարկաների մասին, խոսել հեռանկարներից և աշխատաշուկայից։

Միջոցառման սկզբում ներկաներին ողջունեցին Սոցիոլոգիայի ֆակուլտետում գործող ծրագրի ուսանողները։ Նրանք միաձայն փաստեցին, որ PR-ն ամենուր է, և PR-ից կարելի է ստանալ ամեն ինչ. «Եկե՛ք «PR» և կատարեք Ձեր մասնագիտական լավագույն ընտրությունը»։

Ուսանողների խոսքից հետո «Հասարակայնության հետ կապեր» մագիստրոսական ծրագրի մասին խոսեցին ծրագրի ղեկավար Նվարդ Մելքոնյանը, փոխդեկան Անահիտ Սահակյանը և ծրագրի դասախոս Լիլիթ Շաքարյանը։

Ն. Մելքոնյանը ներկայացրեց այս ուսումնական տարում ծրագրում կատարված փոփոխություններն ու նորամուծությունները՝ ուրախությամբ հավելելով, որ ավելացվել են անվճար տեղերը։

Ապա իրենց սեփական փորձի, աշխատանքի ու հաջողությունների մասին խոսեցին ծրագրի շրջանավարտ Իշխան Սահակյանը և «SPRING PR» ընկերության հասարակայնության հետ կապերի տնօրեն Մարիամ Սաֆարյանը։

Հանդիպման վերջում ներկաները հարցեր հղեցին միջոցառման կազմակերպիչներին։