«ՄԱՐՄՆԻ ԼԵԶՈՒՆ ԳՈՐԾՆԱԿԱՆ ԿՅԱՆՔՈՒՄ» ԽՈՐԱԳՐՈՎ ՎԱՐՊԵՏՈՒԹՅԱՆ ԴԱՍ ԵՊՀ-ՈՒՄ

Վարպետության դասը նախաձեռնել էր ԵՊՀ շրջանավարտների և կարիերայի կենտրոնը, որի տնօրեն Լիլիթ Հակոբյանը, ողջունելով ներկաներին, շնորհակալություն հայտնեց մասնակցության համար և խորհուրդ տվեց հետևել կենտրոնի կազմակերպած հանդիպումների մասին թարմացումներին. «Մենք պարբերաբար նախաձեռնում ենք հանդիպումներ և վարպետության դասեր ոլորտի առաջատար մասնագետների հետ, ուստի, հետևելով մեր կայքի թարմացումներին, դուք հնարավորություն կստանաք տեղեկացված լինելու մեր ապագա միջոցառումների մասին»:

«Մարմնի լեզուն գործնական կյանքում» վարպետության դասը վարող Հակոբ Մակդիսը ոլորտի առաջատար մասնագետներից է, և մեզ հետ զրույցում նա կարևորեց նմանաբնույթ միջոցառումների նշանակությունը:

«Այսպիսի հանդիպումների շնորհիվ թե՛ ուսանողները, թե՛ դասախոսները հնարավորություն կունենան մարմնի լեզուն ավելի լավ  ուսումնասիրելու՝ տեղեկանալով ժամանակակից գիտական ուսումնասիրությունների մասին,  ինչի շնորհիվ կկարողանան բիզնեսում գրագետ հարաբերութուններ ստեղծել և պահել դրանք »,- շեշտեց  Հակոբ Մակդիսը:

Վարպետության դասի ընթացքում պարոն Մակդիսը նշեց, որ մարդն իր առօրյայում 30 րոպեի ընթացքում կարող է ուղարկել մոտ 800 ոչ վերբալ ազդանշան, և եթե մարդու ուղեղը բավականաչափ մարզված լինի, կկարողանա շատ երևույթներ ավելի պարզորոշ տեսնել։

«Ըստ ժամանակակից հետազոտությունների՝ հաղորդակցման մեջ մարմնի լեզուն առանձնահատուկ կարևոր է և կարող է վճռորոշ նշանակություն ունենալ բիզնեսի հաջողման գործընթացում»,- փաստեց բանախոսը:

Դասընթացի ժամանակ բանախոսը ներկայացրեց «V3» (ձայն, տեսք, լեզու) կանոնի կիրառումը գործնական կյանքում, անդրադարձավ հաղորդակցման ժեստերի տեսակներին. «Առավել ուշադիր պետք է դիտարկել  այն ժեստերը, որոնցով զուգահեռ շեշտվում է որևէ միտք կամ խոսք»:

Սահմանելով «Մարմնի լեզուն»՝ բանախոսը նշեց, որ այն իր մեջ ներառում է կեցվածք, ժեստեր, ձեռքսեղմում, աչքի կոնտակտ, դեմքի արտահայտություն:

Ըստ բանախոսի՝ մարմնի լեզուն կոնտեքստային համադրության լեզու է, որտեղ կարևորվում են ինչպես ժեստերը, այնպես էլ համատեքստը:

Վարպետության դասի վերջում տեղի ունեցավ «Դեմ առ դեմ» ձևաչափով քննարկում:

Անի Պողոսյան