«EU BUSINESS SCHOOL»-Ի ՎԵՐԱԲԵՐՅԱԼ ՏԵՂԵԿԱՏՎԱԿԱՆ ՀԱՆԴԻՊՈՒՄ ԵՊՀ-ՈՒՄ

Հանդիպումը կազմակերպել էր ԵՊՀ շրջանավարտների և կարիերայի կենտրոնը, որի  փոխտնօրեն Կարինե Նազարյանը, ողջունելով ներկաներին,  տեղեկացրեց, որ  մեկնարկում է նոր համագործակցություն կենտրոնի և  «EU Business School»-ի միջև:

«Մենք նոր համագործակցություն ենք սկսում  «EU Business School»-ի հետ, որի մասնաճյուղերը գործում են  Շվեյցարիայում, Իսպանիայում և Գերմանիայում,- ասաց Կարինե Նազարյանը,- այս համագործակցության արդյունքում մենք փորձելու ենք նաև օնլայն դասընթացներ կազմակերպել ՝ ներառելով հայաստանյան և արտասահմանյան մասնագետների»:

Տիկին Նազարյանը նշեց, որ ապագայում տեղի ունեցող դասընթացների մասին ավելի մանրամասն  ուսանողները կարող են ծանոթանալ՝ հետևելով կայքի թարմացումներին:

 Մեզ հետ զրույցում «EU Business School»-ի տարածաշրջանային ղեկավար Մանե Տոնոյանը հավելեց, որ հանդիպման նպատակն է ուսանողներին և շրջանավարտներին ներկայացնել «EU Business School»-ի կրթական ծրագրերը, ինչպես նաև դպրոցի ընձեռած հնարավորությունները, որոնց շնորհիվ ուսանողներն հաջողությամբ աշխատանք են գտնում:

«Մեր դպրոցի առավելություններից մեկն այն է, որ շրջանավարտներն հետագայում կարողանում են շատ արագ իրենց բիզնեսը ստեղծել ,-ասաց  Մանե Տոնոյանը,-բացի դրանից ուսանողներն հնարավորություն ունեն տարբեր երկրներում կապեր ձեռք բերելու, ինչպես նաև ստանալու պրակտիկ կրթություն իրենց նախընտրած ոլորտում»:

Հանդիպման ընթացքում Մանե Տոնոյանն ուսանողներին ներկայացրեց  միջազգային,  մասնագիտորեն հավատարմագրված «EU Business School»-ի հիմնադրման պատմություն ու այնտեղ սովորելու առավելությունները. «Հարկ է նշել, որ մեր շրջանավարտների մեծ մասը դպրոցն ավարտելուց  հետո 6 ամսվա ընթացքում գտնում է աշխատանք կամ բացում է իր սեփական բիզնեսը, ինչը նշանակում է, որը դպրոցը կարողանում է ոլորտի մասին  պրակտիկ գիտելիքներով ապահովել ուսանողներին»:

Վերջինս ներկայացրեց «EU Business School» ընդունվելու վերաբերյալ ընթացակարգերը, բակալավրի, մագիստրատուրայի կրթական ծրագրերը, ինչպես նաև դպրոցում օնլայն սովորելու հնարավորությունները:

Հանդիպման վերջում Մանե Տոնոյանը պատասխանեց ներկաներին հուզող հարցերին:

Անի Պողոսյան