Ֆիզիկական քիմիայի լաբորատորիա

Ֆիզիկական քիմիայի գիտահետազոտական լաբորատորիայի հիմնական ուղղություններն են կենսաբժշկական ֆիզիկական քիմիան և լուծույթների ֆիզիկական քիմիան։

Կենսաբժշկական ֆիզիկական քիմիան անմիջականորեն առնչվում է կենսաբանական մոլեկուլների և մոդելային համակարգերի փորձարարական և տեսական քվանտաքիմիական ուսումնասիրությունների հետ։ Մասնավորապես մոլեկուլային մակարդակով հետազոտվում են սպիտակուցների, ամինաթթուների, պեպտիդների, նուկլեինա­թթու­ների, ԴՆԹ-ի, լիպիդների և այլ մոլեկուլների փոխազդեցու­թյունները տարբեր լիգանդների հետ, ինչպես նաև արտաքին գործոնների (միջավայրի բևեռայնություն, ջերմաստիճան, թթվայնություն) ազդեցությունը դրանց կառուցվածքի վրա։ Ուսումնասիրվում են նաև կենսաբժշկական նշանակության համակարգերին առնչվող նանոմասնիկների հատկությունները և վարքը՝ կախված խառը լուծիչների բնույթից և բաղադրությունից:

Լուծույթների ֆիզիկական քիմիայի հիմնական խնդիրներն են լուծույթների առաջացման թերմոդինամիկական բնութագրերի, դրանց կառուցվածքի և ֆիզիկաքիմիական հատկությունների հետզոտությունները։ Մասնավորապես ուսումնասիրվում են երկ- և եռբաղադրիչ բարդ համակարգեր, մակերևութային ակտիվ նյութերի ուղիղ ու շրջված միցելային համակարգերը, դրանցում կատարվող փոխազդեցությունները։