Ընդհանուր մաթեմատիկայի ամբիոն

Ընդհանուր մաթեմատիկայի ամբիոնն իրականացնում է ուսումնական մի քանի ծրագրեր, որոնք ընդգրկում են հիմնականում ընդհանուր մաթեմատիկական դասընթացներ ինչպես մաթեմատիկայի և մեխանիկայի ֆակուլտետի, այնպես էլ ԵՊՀ բնագիտական տարբեր ֆակուլտետների 1–ին և 2–րդ կուրսի ուսանողների համար։

Վերջին տարիներին ամբիոնը ղեկավարել են պրոֆեսորներ Վ․Խ․ Մուսոյանը, Ա․ Ի․ Պետրոսյանը։ 2014 թվականից ընդհանուր մաթեմատիկայի ամբիոնի վարիչն է ֆ․մ․գ․դ․ Կ․ Լ․ Ավետիսյանը։

Ամբիոնի աշխատակիցները մասնավորապես կարդում են մաթեմատիկական անալիզի դասընթացը՝ ակտուարական և ֆինանսական մաթեմատիկայի մասնագիտությամբ 1–ին և 2–րդ կուրսի ուսանողների, ինչպես նաև տնտեսագիտության և կառավարման ֆակուլտետի 1–ին կուրսի ուսանողների համար։ Բարձրագույն մաթեմատիկայի ընդհանուր դասընթացներ են կարդացվում քիմիայի, կենսաբանության, աշխարհագրության և երկրաբանության ֆակուլտետների, ֆարմացիայի ինստիտուտի ուսանողների համար։

Ամբիոնի աշխատակիցները ներգրավված են դրամաշնորհային ծրագրերում։ Նրանց գիտական հետաքրքրությունների հիմնական ուղղություններն են բազմաչափ տիրույթներում ֆունկցիոնալ կշռային տարածությունների և հարակից օպերատորների տեսությունը և որոշ կիրառություններ քվատերնիոն և Քլիֆորդի անալիզի շրջանակներում։

Ամբիոնն ունի գիտական համագործակցություն Վայմարի Բաուհաուս համալսարանի (Գերմանիա) և Ստոկհոլմի թագավորական տեխնոլոգիական ինստիտուտի (Շվեդիա) հետ։