Հավանականությունների տեսության և մաթեմատիկական վիճակագրության ամբիոն

Հավանականությունների տեսության և մաթեմատիկական վիճակագրության ամբիոնը ստեղծվել է 1967 թ. Գ. Համբարձումյանի, Ա. Թալալյանի և Ս. Թումանյանի ջանքերով: Ամբիոնի առաջին վարիչն էր ֆ․մ․գ.թ., դոցենտ Գ. Համբարձումյանը։ Ամբիոնի հիմնադրման տարիներին այնտեղ աշխատել են ականավոր գիտնականներ Ս. Թումանյանը, Ն. Պետրոսյանը, Լ. Նիկողոսյանը, Ա. Ֆռանգուլյանը, Եվ. Հարությունյանը, Տ. Ղազանչյանը: Տարբեր տարիների ամբիոնը ղեկավարել են Ռ. Համբարձումյանը, Է. Դանիելյանը, իսկ 2011 թ. մինչ այժմ ամբիոնի վարիչն է ֆ․մ․գ․դ․, պրոֆեսոր Վ. Օհանյանը։

70-ական թվականներին Հայաստանում սկսվեց ասպիրանտների պատրաստում հավանականությունների տեսության տարբեր ուղղություններով: Ակադեմիկոս Ռ. Վ. Համբարձումյանի ջանքերով ստեղծվեց ստոխաստիկ երկրաչափության դպրոց:

«Հավանականությունների տեսություն և մաթեմատիկական վիճակագրություն» մասնագիտացումից բացի` ամբիոնը կազմակերպում էր ընդհանուր դասընթացը ԵՊՀ բոլոր ֆակուլտետներում:

Ամբիոնի գիտական կադրերից շատերը կրթություն էին ստացել արտերկրում (Մոսկվայի, Սանկտ Պետերբուրգի, Կիևի համալսարաններ)։ Նրանց թվում էին ֆ.մ.գ.դ., պրոֆեսորներ Է. Դանիելյանը, Վ. Սարաֆյանը, ֆ.մ.գ.թ., դոցենտներ Ն. Մեսրոպյանը, Ս. Նարիմանյանը, Ա. Սիմոնյանը, Կ. Գասպարյանը: Այսօր ամբիոնում շարունակում են դասավանդել ոլորտի առաջատար մասնագետներ, որոնք ծավալում են գիտամանկավարժական ակտիվ գործունեություն։

Ամբիոնի հիմնական գիտական ուղղություններն են՝ պատահական պրոցեսներ և նրանց կիրառություններ, հերթերի տեսություն, ստոխաստիկ երկրաչափություն, մաթեմատիկական, կիրառական և բայեսյան վիճակագրություններ, հավանականային մոդելներ կենսաինֆորմատիկայում:

Հավանականությունների տեսություն և մաթեմատիկական վիճակագրության ամբիոնն իրականացնում է «Կիրառական վիճակագրություն և տվյալների գիտություն» բակալավրիատական և մագիստրոսական կրթական ծրագրերը։ Վերջինս մեկնարկել է 2018-2019 ուստարում:

Հավանականությունների տեսություն և մաթեմատիկական վիճակագրության բաժնի ուսանողները հնարավորություն ունեն ուսումը շարունակելու Ֆրանսիայում՝ Լեմանի համալսարանի մագիստրատուրայում։