Մեխանիկա և կիրառական մաթեմատիկա

«Մեխանիկա և կիրառական մաթեմատիկա» կրթական ծրագրի տևողությունը 2 տարի է։ Ուսման վարձը կազմում է 600 000 ՀՀ դրամ։

Ծրագրի շրջանավարտները ստանում են մագիստրոսի որակավորում։

Ընդունելության պահանջները

Ծրագրում կարող են ընդգրկվել ՀՀ պետական և հավատարմագրված ոչ պետական բարձրագույն ուսումնական հաստատությունների՝ բակալավրի կամ դիպլոմավորված մասնագետի որակավորում ունեցող շրջանավարտները։

Անվճար և վճարովի ուսուցման ձևերով ընդունելությունը կատարվում է՝ անկախ միջին որակական գնահատականից (ՄՈԳ),  բացառապես մասնագիտական քննությունների արդյունքների հիման վրա, մրցութային կարգով (ընդունելության քննության հարցաշարը՝ այստեղ)։

Ծրագրի նպատակը

Ծրագրի նպատակն է պատրաստել մեխանիկայի և կիրառական մաթեմատիկայի բնագավառի մասնագետներ՝ ունակ վարելու մասնագիտական, գիտահետազոտական և գիտամանկավարժական գործունեություն, զարգացնել ուսանողների մասնագիտական ունակությունը մեխանիկայի, կիրառական և հաշվողական մաթեմատիկայի, շարժման ղեկավարման և կայունության ուսումնասիրման բնագավառներում, զարգացնել ուսանողների՝ մասնագիտության տեսական հիմունքների և ֆիզիկամեխանիկական խնդիրների մաթեմատիկական մոդելավորման սկզբունքների իմացությունը։

Առավելությունները

Շրջանավարտները հնարավորություն ունեն ուսումը շարունակելու ԵՊՀ, ՀՀ ԳԱԱ մեխանիկայի ինստիտուտի և այլ համալսարանների ասպիրանտուրայում, գիտական աշխատանք կատարելու համալսարաններում, ՀՀ ԳԱԱ մեխանիկայի ինստիտուտում և հետազոտական, ճարտարագիտական այլ կենտրոններում։

Մագիստրոսները կարող են դասավանդել համալսարաններում, հանրակրթական և մասնագիտական ուսումնական հաստատություններում:

Կարիերայի հնարավորությունները

«Մեխանիկա և կիրառական մաթեմատիկա» կրթական ծրագրի շրջանավարտները կարող են աշխատել մեխանիկայի, մաթեմատիկայի, ֆիզիկայի և հարակից բնագավառների գիտահետազոտական ինստիտուտներում և կենտրոններում, նախագծային, ճարտարագիտական, ղեկավարման խնդիրներով զբաղվող հաստատություններում, տեղեկատվական տեխնոլոգիաների ոլորտներում։