Փիլիսոփայության պատմության, տեսության և տրամաբանության ամբիոն

Փիլիսոփայության պատմության, տեսության և տրամաբանության ամբիոնը ձևավորվել է 2019 թ․ տեսական փիլիսոփայության, տրամաբանության և հռետորիկայի ու փիլիսոփայության պատմության ամբիոնների միավորման արդյունքում: 2019 թվականից մինչ օրս ամբիոնի վարիչն է փ.գ.դ., պրոֆեսոր Սեյրան Զաքարյանը: 

Image

Նախորդ ամբիոնները ղեկավարել են ՀՀ ԳԱԱ ակադեմիկոս Գ․ Բրուտյանը, փ․գ․դ․, պրոֆեսոր Հր․ Շաքարյանը, ՀՀ ԳԱԱ թղթակից անդամ Ա․ Մանասյանը, փ․գ․դ․, պրոֆեսորներ Հ․ Գաբրիելյանը, Գ․ Խրլոպյանը, Գ․ Մխիթարյանը, Հ․Միրզոյանը։

 

Ամբիոնի դասախոսները փիլիսոփայության բաժնի բակալավրիատում և մագիստրատուրայում կարդում են փիլիսոփայության պատմությանը, մշակութաբանությանը, բանավեճի տեսությանը, տրամաբանությանը, գոյաբանությանը, մեթոդաբանությանը, իմացաբանությանը, ստեղծագործության տեսությանը և մաթեմատիկային, փիլիսոփայական հիմնախնդիրներին վերաբերող  ընդհանուր և մասնագիտական դասընթացներ: Ամբիոնը միաժամանակ պատրաստում է համաշխարհային և հայ փիլիսոփայության, մշակույթի պատմության, տրամաբանության, հռետորիկայի գծով մասնագետներ: Տարիների ընթացքում բազմաթիվ ասպիրանտներ և հայցորդներ պաշտպանել են թեկնածուական թեզեր, իսկ ոմանք նաև դոկտորական ատենախոսություններ: 

Ամբիոնի դասախոսներ Ս. Խաչատրյանը և Ս. Պետրոսյանը 2005 թ․ մասնակցել են հանրակրթական դպրոցում «Հասարակագիտություն» առարկայի պետական կրթական չափորոշիչների մշակման ու վերամշակման գործընթացներին, հեղինակել հասարակագիտության ուսուցիչների համար մի շարք ձեռնարկներ, ուղեցույցներ ու աշխատանքային տետրեր: Նրանք, համագործակցելով այլ հասարակագետների հետ, համահեղինակել են «Հասարակագիտություն, 8-րդ դասարան»  «Հասարակագիտություն, 10-րդ դասարան» և «Հասարակագիտություն, 12-րդ դասարան» դասագրքերը:

Վերջին տասնամյակում ամբիոնի դասախոսները պետբյուջեից ֆինանսավորվող թեմաների շրջանակում հրատարակել են մի շարք մենագրություններ: Մասնավորապես Ս. Զաքարյանը հրատարակել է «Հայկական Վերածննդի հարցը» (մեթոդաբանական վերլուծություն) ,«Գրիգոր Տաթևացին ողորմություն առաքինության մասին» , Հ. Միրզոյանը՝ «Գրիգոր Նարեկացու բառաստեղծական արվեստը» (2006), «Նարեկացիական հետազոտություններ, Ա. Սարգսյանը՝ «Փիլիսոփայականը և գաղափարախոսականը Գարեգին Նժդեհի տեսական ժառանգության մեջ»,  Ա․ Մանասյանը՝ «Լեռնային Ղարաբաղ: Ինչպես է դա եղել», Հ․ Հովհաննիսյանը «Բանվեճի տեսություն և արվեստ. փիլիսոփայական քննախոսություն», Ա․ Վարդումյանը «Հռետորիկա շատերի և յուրաքանչյուրի համար» և այլ աշխատություններ։

Ամբիոնի դասախոսները գործուն մասնակցություն են ունենում հանրապետությունում և նրա սահմաններից դուրս տեղի ունեցող գիտաժողովների և գիտական սեմինարների աշխատանքներին, ինչպես նաև համագործակցում  են արտասահմանյան մի շարք համալսարանների հետ։