ՈԱ գործընթացներ
ԵՊՀ-ում 2002 թվականից ներդրվել է դասավանդման որակի և արդյունավետության վերաբերյալ ուսանողական հարցումների համակարգը:
Ուսանողական հարցումներն անցկացվում են «Կրթության մասին» Հայաստանի Հանրապետության օրենքի և ԵՊՀ կանոնադրության պահանջների համաձայն և համարվում են ԵՊՀ ուսանողների ուսուցման որակն ապահովող գործառույթներին մասնակցելու և դասախոսական կազմի գործունեության արդյունավետությունը գնահատելու իրավունքի դրսևորում:
Ուսանողների կողմից դասախոսական կազմի գնահատման մեխանիզմի արդյունավետությունը բարձրացնելու նպատակով անցած տարիների ընթացքում պարբերաբար լրամշակվել և կատարելագործվել են հարցման մեթոդաբանությունը, ընթացակարգը և չափանիշները (հարցաշարը)։ Փոփոխություններ են արվել հարցման արդյունքների քննարկումների կանոնակարգման և դրանց արդյունավետ կիրառման, ինչպես նաև հարցաշարի որոշ հարցերի հստակեցման ու համալրման ուղղություններով:
Հարցումների անցկացումը կանոնակարգվում է՝ համաձայն «ԵՊՀ-ում դասավանդման որակի և արդյունավետության վերաբերյալ ուսանողների հարցման» կանոնակարգի (նոր խմբագրությամբ հաստատվել է ԵՊՀ գիտական խորհրդի՝ 2017 թ. հունվարի 26-ի նիստի № 4/2 որոշմամբ)։
Սկսած 2017 թվականից՝ հարցումներն անցկացվում են յուրաքանչյուր կիսամյակի քննաշրջանից հետո առցանց եղանակով: Ուսանողը հնարավորություն ունի հարցմանը մասնակցելու ցանկացած վայրից՝ օգտվելով ԵՊՀ ուսանողական անհատական վիրտուալ տիրույթից, մուտք գործելով իր համալսարանական էլհասցե: Հարցումն անցկացվում է 1-5 միավորանոց գնահատման սանդղակով:
Անաչառություն ապահովելու նպատակով հարցումները և տվյալների մշակումն իրականացվում են կենտրոնացված, հարցման անցկացման պայմանների և արդյունքների վերլուծության միասնական չափանիշների հիման վրա։ Հարցման արդյունքները քննարկվում են ամբիոնների, ֆակուլտետների գիտական խորհուրդների, այնուհետև ԵՊՀ ԳԽ նիստերում:
Քննարկման արդյունքներն օգտագործվում են ինչպես դասավանդման մոտեցումները և կիրառվող մեթոդները կատարելագործելու, այնպես էլ դասախոսների պաշտոնակալման, առաջխաղացման և խրախուսման նպատակներով:
2019/2020 ուստարում դասավանդման որակի և արդյունավետության վերաբերյալ ուսանողական հարցումներին մասնակցել է ԵՊՀ բակալավրիատական և մագիստրոսական կրթական ծրագրերում ընդգրկված ուսանողական համակազմի 25,96%-ը։
ԵՊՀ կրթական ծրագրերի արդյունավետության գնահատման գործող մեխանիզմներից են ԵՊՀ-ում ստացած կրթությունից շրջանավարտների բավարարվածության վերաբերյալ տարեկան պարբերականությամբ իրականացվող հարցումները, որոնք անցկացվում են 2009 թվականից։
Հարցումներն իրականացնելու համար կիրառվում են համապատասխան հարցաթերթ և կարգ, որոնք վերանայվել են մի քանի անգամ։ ԵՊՀ-ում ստացած կրթությունից շրջանավարտների բավարարվածության վերաբերյալ հարցումների կազմակերպման կարգը վերջին անգամ (նոր խմբագրությամբ) հաստատվել է ԵՊՀ գիտական խորհրդի՝ 2017 թ․ հոկտեմբերի 12-ի №1 նիստում:
ԵՊՀ-ում ստացած կրթությունից շրջանավարտների բավարարվածության վերաբերյալ հարցումը ԵՊՀ որակի ապահովման ներքին համակարգի կարևորագույն բաղադրիչներից է և անցկացվում է առցանց եղանակով: Հարցմանը մասնակցում են ԵՊՀ բակալավրիատի ու մագիստրատուրայի առկա և հեռակա ուսուցման համակարգի բոլոր շրջանավարտները:
Հարցումների կազմակերպման կարգը սահմանում է դրանց անցկացման, արդյունքների մշակման և օգտագործման պայմանները, իսկ հարցաթերթը պարունակում է համապատասխան բաժին, որտեղ շրջանավարտները գնահատում են իրենց բավարարվածությունը կրթական ծրագրերի բովանդակությունից և ուսուցման մեթոդաբանությունից։ Հարցումների արդյունքներն ամփոփվում, վերլուծվում և հրապարակվում են համապատասխան տարեկան զեկույցում, որը քննարկվում է ԵՊՀ գիտական խորհրդի նիստում։
2019/2020 ուստարվա շրջանավարտների բավարարվածության վերաբերյալ հարցման արդյունքների ամփոփում
ԵՊՀ կրթական ծրագրերի որակի և արդիականության արտաքին գնահատման նպատակով ԵՊՀ-ն 2012 թ․ մշակել է ԵՊՀ շրջանավարտների մասնագիտական հմտություններով և կարողություններով գործատուների բավարարվածության հարցումների ընթացակարգը և իրականացրել մի շարք պիլոտային հարցումներ տարբեր բնագավառներում, ինչպիսիք են իրավագիտությունը, տնտեսագիտությունը, ինֆորմատիկան, ռադիոֆիզիկան, սոցիալական աշխատանքը, դեղագործությունը և ժուռնալիստիկան: Հարցումների հաշվետվությունները հասանելի են ԵՊՀ համապատասխան ֆակուլտետների ամբիոնների համար և կիրառվելու են կրթական ծրագրերի վերանայման գործընթացներում:
ԵՊՀ հիմնական գործատուները ներգրավված են նոր մշակվող կրթական ծրագրերի փորձագիտական գնահատման գործընթացում՝ համաձայն ԵՊՀ կրթական ծրագրերի հաստատման կարգի 3.4. կետի:
Բացի դրանից՝ ԵՊՀ կրթական ստորաբաժանումները (ֆակուլտետները, ինստիտուտները և կենտրոնները) պարբերաբար իրականացնում են իրենց շրջանավարտների մասնագիտական հմտություններից և կարողություններից հիմնական գործատու կազմակերպությունների բավարարվածության հարցումներ:
ԵՊՀ-ում ինստիտուցիոնալ հավատարմագրման գործընթացը մեկնարկել է 2012 թ․ մարտին և իրականացվել է ՀՀ կառավարության կողմից 2011 թ․ հունիսի 30-ին հաստատված «ՀՀ միջին և բարձրագույն մաuնագիտական հիմնական կրթական ծրագրեր իրականացնող ուuումնական հաuտատությունների պետական հավատարմագրման կարգի» համաձայն (Ինստիտուցիոնալ ինքնագնահատման զեկույց)։
ԵՊՀ ինստիտուցիոնալ և ծրագրային հավատարմագրման գործընթացներն իրականացվել են հավատարմագրման և որակի ապահովման գործընթացներին աջակցելու նպատակով` Համաշխարհային բանկի ֆինանսավորմամբ իրականացվող «Հայաստանում որակի ապահովման տեխնիկական աջակցություն» ծրագրի շրջանակում, որն իրագործվում է ՈԱԱԿ-ի և NVAO (Nederlands Vlaamse Accreditatie organisatie) նիդերլանդական անկախ հավատարմագրող կազմակերպության համատեղ ջանքերով։
2019/2020 ուստարում մեկնարկել է ԵՊՀ հավատարմագրման նոր գործընթացը, որի առաջին փուլը ԵՊՀ ինքնագնահատման նպատակով ինստիտուցիոնալ կարողությունների ինքնավերլուծության կազմակերպումը և համապատասխան զեկույցի պատրաստումն է: Չնայած «COVID-19» համավարակի պատճառով ստեղծված իրավիճակին՝ սահմանված ժամկետում հայերեն և անգլերեն տարբերակներով պատրաստվել է «Երևանի պետական համալսարանի ինստիտուցիոնալ կարողությունների ինքնավերլուծություն» զեկույցը՝ իր հավելվածով, որը ներկայացվել է արտաքին գնահատումն իրականացնող կառույցին՝ Որակի ապահովման ազգային կենտրոնին:
Երևանի պետական համալսարանի կենսաբանության ֆակուլտետում կրթական ծրագրերի փորձնական հավատարմագրումն իրականացվել է Համաշխարհային բանկի դրամաշնորհային ծրագրի և ՀՀ կրթության, գիտության, մշակույթի և սպորտի նախարարության կրթական ծրագրերի կենտրոնի աջակցությամբ։ Հավատարմագրման գործընթացի իրականացմանը նպաստել են «Հայաստանում որակի ապահովման տեխնիկական աջակցություն» ծրագիրը, որը համակարգում էր Նիդերլանդների և Ֆլանդրիայի հավատարմագրման կազմակերպությունը և «Փորձնական հավատարմագրումներ» ծրագիրը, որը համակարգում էր «Մասնագիտական կրթության որակի ապահովման ազգային կենտրոն» հիմնադրամը։
ԵՊՀ կենսաբանության ֆակուլտետում կրթական ծրագրերի փորձնական հավատարմագրմանը մասնակցել են «Կենսաբանություն» բակալավրիատական և «Գենետիկա» մագիստրոսական կրթական ծրագրերը։
ԵՊՀ ուսումնառության ռեսուրսների և ուսանողների աջակցության ծառայությունների գնահատման և պարբերական բարելավման նպատակով մշակվել է համապատասխան ղեկավար ձեռնարկ (ուղեցույց), որը հասանելի է համապատասխան կառույցներին:
