Արաբագիտության ամբիոն

Արաբերենը Երևանի պետական համալսարանում դասավանդվել է վերջինիս հիմնադրման առաջին օրերից։ Բանասիրական ֆակուլտետի կազմում Արևելյան լեզուների ամբիոնը ձևավորվել է 1940-ական թթ.։ Այնուհետև՝ 1968 թ., երբ հիմնվել է Արևելագիտության ֆակուլտետը, նրանից առանձնացվել են Իրանական բանասիրության ու Արաբական և թուրքական բանասիրության ամբիոնների։

Արաբագիտության ամբիոնը՝ որպես ԵՊՀ գիտաուսումնական ինքնուրույն ստորաբաժանում, հիմնադրվել է 1992 թ․ ԵՊՀ գիտական խորհրդի որոշմամբ։ Արաբական և թուրքական բանասիրության և Արևելքի երկրների պատմության ամբիոնների վերակազմավորման արդյունքում ստեղծվել են Արաբագիտության և Թյուրքագիտության ամբիոնները։ Արաբագիտության ամբիոնի հիմնադիր վարիչն է պրոֆեսոր Դավիթ Հովհաննիսյանը։

Երկար տարիներ Արաբագիտության ամբիոնի գիտակրթական գործունեությունը ղեկավարել է բ.գ.թ., դոցենտ Սամվել Կարաբերկյանը, ապա՝ բ.գ.թ., դոցենտ Սոնա Տոնիկյանը։ 2016 թ. դեկտեմբերից Արաբագիտության ամբիոնի վարիչն է պ.գ.թ., դոցենտ Հայկ Քոչարյանը:

Արաբագիտությունը համալիր գիտություն է, որը ներառում է մի շարք գիտակարգեր։ Այժմ ամբիոնի գիտակրթական գործունեության ոլորտը ներառում է արաբագիտության բոլոր հիմնական ուղղությունները՝ լեզվաբանությունը, միջնադարյան արաբական մշակույթն ու պատմությունը, իսլամագիտությունը, նոր և նորագույն շրջանների արաբական գրականությունը, ժամանակակից տարածաշրջանային խնդիրների ուսումնասիրությունը։ Բացի արաբագիտության ուսումնասիրությունից՝ ամբիոնը զբաղվում է նաև եբրայագիտական ուսումնասիրություններով և Հայաստանում եբրայագիտության զարգացմամբ։

Ամբիոնում աշխատում են ոլորտի ճանաչված և առաջատար մասնագետներ, որոնք պարբերաբար մասնագիտական վերապատրաստում են անցնում թե՛ Հայաստանում, թե՛ դրա սահմաններից դուրս, ներգրավված են միջազգային ու տեղական դրամաշնորհային ծրագրերում, մասնագիտական սերտ համագործակություն են իրականացնում արտերկրի անվանի բուհերի՝ արաբագիտության և հարակից ոլորտների մասնագետների հետ: Ամբիոնի գիտնական-մանկավարժները հեղինակ են ուսումնամեթոդական ձեռնարկների, մենագրությունների, դպրոցական դասագրքերի, գիտական հոդվածների, որոնք տպագրվում են նաև բարձր ազդեցության գործակից ունեցող պարբերականներում։

Մեծ կարևորություն է տրվում ակադեմիական ազատությանը և վերլուծական մտքի զարգացմանը։ Ուսումնառության ընթացքում ամբիոնի ուսանողները հնարավորություն են ստանում արաբերենի մեկամյա վերապատրաստում անցնելու Եգիպտոսի, Քուվեյթի, Կատարի և Հորդանանի համալսարանների լեզուների կենտրոններում։ Բացի արաբերենից՝ ուսանողները հնարավորություն են ստանում նաև ուսումնասիրելու երկրորդ արևելյան լեզու։ Ամբիոնը համագործակցում է ՀՀ-ում արաբական երկրների դեսպանությունների, արաբական տարբեր կազմակերպությունների ու հիմնադրամների, ինչպես նաև աշխարհի արաբագիտական տարբեր կենտրոնների հետ, որոնց մասնագետները պարբերաբար դասախոսություններ են կարդում ամբիոնում։

Արաբագիտության ամբիոնն իրականացնում է «Արաբագիտություն» բակալավրիատական և «Կիրառական արաբագիտություն» մագիստրոսական կրթական ծրագրերը։